رپورٹ کے مطابق عالمی مارکیٹ میں سونا 85 ڈالر فی اونس مہنگا ہو گیا، بین الاقوامی مارکیٹ میں فی اونس سونا کے نرخ 85 روپے کے اضافے کے بعد 4 ہزار 894 ڈالر پر جا پہنچے۔
دوسری جانب عالمی مارکیٹ میں خام تیل کی قیمتوں میں کمی آگئی، عالمی منڈی میں خام تیل 11.5فیصد سستا ہو گیا، ایک بیرل خام تیل کی قیمت میں 10 ڈالر کمی ریکارڈ کی گئی ہے۔
عالمی منڈی میں خام تیل کی 81 ڈالرفی بیرل میں ٹریڈنگ ہو رہی ہے ، امریکی خام تیل بھی 11 ڈالر سستا ہو کر 83 ڈالرمیں فروخت ہو رہا ہے۔
خیال رہے کہ ایران نے لبنان میں جنگ بندی کے بعد آبنائے ہرمز کو تجارتی جہازوں کے لیے مکمل طور پر کھولنے کا اعلان کیا ہے۔
یہ بھی پڑھیں: سونے کی قیمتوں کو بریک لگ گئی
ایرانی وزیر خارجہ عباس عراقچی نے سماجی رابطوں کی ویب سائٹ ایکس (سابقہ ٹویٹر) پر جاری ایک پیغام میں کہا کہ آبنائے ہرمز کو تمام کمرشل جہازوں کے لیے کھول دیا گیا ہے اور جنگ بندی کی باقی مدت کے دوران یہ راستہ مکمل طور پر فعال رہے گا۔
ان کا کہنا تھا کہ اس دوران تجارتی جہازوں کی آمد و رفت جاری رہے گی، تاہم جہازوں کو ایران کی بندرگاہوں اور بحری امور کی تنظیم کی جانب سے پہلے سے مقرر کردہ مربوط راستوں پر سفر کرنا ہوگا۔
دوسری جانب امریکی صدر ڈونلڈ ٹرمپ نے آبنائے ہرمز کو کھولنے پر ایران سے اظہار تشکر کیا ہے۔
