تازہ ترین اعداد و شمار کے مطابق عالمی مارکیٹ میں سونا 153 ڈالر مہنگا ہو کر 4713 ڈالر فی اونس کی سطح پر پہنچ گیا، جس کے اثرات مقامی مارکیٹ میں بھی نمایاں ہوئے۔

عالمی منڈی میں اس اضافے کے بعد مقامی مارکیٹ میں ایک تولہ سونے کی قیمت 15 ہزار 300 روپے اضافے کے بعد 4 لاکھ 94 ہزار روپے سے تجاوز کر گئی ہے، جبکہ 10 گرام سونا 13 ہزار 117 روپے مہنگا ہو کر 4 لاکھ 23 ہزار 578 روپے پر پہنچ گیا۔

اس اضافے کے بعد سونے کی خریداری کرنے والے افراد پر مالی دباؤ بڑھ گیا ہے، سرمایہ کاری کیلئے یہ وقت کافی مہنگا ثابت ہو رہا ہے۔

دوسری جانب چاندی کی قیمت میں بھی اضافہ ہوا ہے اور ایک تولہ چاندی 200 روپے مہنگی ہو کر 7984 روپے کی سطح پر پہنچ گئی ہے۔

معاشی ماہرین کے مطابق عالمی سطح پر سونے اور چاندی کی قیمتوں میں اضافہ، ڈالر کی قدر اور بین الاقوامی مارکیٹ میں غیر یقینی صورتحال کے باعث ہو رہا ہے۔

یہ بھی پڑھیں:مشرق وسطیٰ کی کشیدگی نے تیل کی قیمتوں کو آگ لگا دی

واضح رہے کہ گزشتہ روز بھی ملک بھر میں 24 قیراط کے حامل سونے کی قیمت میں 2 ہزار 800 روپے کا اضافہ ریکارڈ کیا گیا تھا، جس کے بعد فی تولہ سونا 4 لاکھ 78 ہزار 762 روپے پر بند ہوا تھا، اسی طرح چاندی کی قیمت میں 260 روپے کا اضافہ ہوا تھا۔

معاشی ماہرین کا کہنا ہے کہ اگر عالمی مارکیٹ میں اسی طرح کے اتار چڑھاؤ کا رجحان رہا تو آنے والے دنوں میں سونے اور چاندی کی قیمتوں میں مزید اضافہ متوقع ہے، جس سے سرمایہ کاروں کو محتاط رہنے کی ضرورت ہے۔