غیر ملکی خبر ایجنسی کی رپورٹ کے مطابق عالمی بینچ مارک برینٹ نارتھ سی کروڈ آئل کی قیمت 5.2 فیصد اضافے کے بعد 107.54 ڈالر فی بیرل تک جا پہنچی ہے جبکہ ویسٹ ٹیکساس انٹرمیڈیٹ 4.9 فیصد اضافے سے 94.71 ڈالر کا ہو گیا ہے۔

دوسری جانب پاکستان میں بھی ہائی اوکٹین کے بعد اب پٹرول اور ڈیزل پر بھی 5 روپے فی لٹر اضافی لیوی عائد کیے جانے کا امکان ہے۔

پاکستان اور آئی ایم ایف کے درمیان تقریباً 1.2 ارب ڈالر کی اگلی قسط کے حصول کیلئے اسٹاف لیول معاہدہ جلد متوقع ہے، اس سلسلے میں آئی ایم ایف مشن نے میمورنڈم برائے معاشی و مالیاتی پالیسی کا مسودہ حکومت پاکستان کو ارسال کر دیا ہے، جس پر مزید مشاورت جاری ہے۔

یہ بھی پڑھیں: عالمی منڈیاں غیر یقینی کا شکار، تیل اور سونا مہنگا

ذرائع کے مطابق آئی ایم ایف نے حکومت پر ٹیکس اور نان ٹیکس آمدن بڑھانے پر زور دیا ہے، جس کے تحت پٹرولیم لیوی میں اضافے کی تجویز دی گئی ہے، اس کے علاوہ ترقیاتی بجٹ میں 100 ارب روپے کی کٹوتی سے بھی آئی ایم ایف کو آگاہ کیا گیا ہے۔

معاشی ماہرین کا کہنا ہے کہ اگر پٹرولیم لیوی میں اضافہ کیا گیا تو اس کے اثرات براہ راست مہنگائی پر پڑیں گے، جس سے عام آدمی کی مشکلات میں مزید اضافہ ہو سکتا ہے۔