رپورٹس کے مطابق ہائی اوکٹین کے بعد اب پیٹرول اور ڈیزل پر بھی 5 روپے فی لیٹر اضافی لیوی عائد کیے جانے کا امکان ہے۔
پاکستان اور آئی ایم ایف کے درمیان تقریباً 1.2 ارب ڈالر کی اگلی قسط کے حصول کیلئے اسٹاف لیول معاہدہ جلد متوقع ہے، اس سلسلے میں آئی ایم ایف مشن نے میمورنڈم برائے معاشی و مالیاتی پالیسی کا مسودہ حکومت پاکستان کو ارسال کر دیا ہے، جس پر مزید مشاورت جاری ہے۔
معاہدہ طے پانے کی صورت میں وفاقی وزیر خزانہ اور اسٹیٹ بینک آف پاکستان کے گورنر دستخط کریں گے۔
ذرائع کے مطابق آئی ایم ایف نے حکومت پر ٹیکس اور نان ٹیکس آمدن بڑھانے پر زور دیا ہے، جس کے تحت پیٹرولیم لیوی میں اضافے کی تجویز دی گئی ہے، اس کے علاوہ ترقیاتی بجٹ میں 100 ارب روپے کی کٹوتی سے بھی آئی ایم ایف کو آگاہ کیا گیا ہے۔
آئی ایم ایف نے سرکاری اداروں کے سربراہان کی تقرری کے طریقہ کار پر بھی تحفظات کا اظہار کرتے ہوئے اس حوالے سے بورڈز کے اختیارات برقرار رکھنے پر زور دیا، توانائی کے شعبے میں گردشی قرضے پر قابو پانے کیلئے حکومتی پلان بھی آئی ایم ایف کے ساتھ شیئر کیا گیا ہے۔
مزید برآں تیل اور کھاد کی قیمتوں میں ممکنہ اضافے، معاشی دباؤ اور علاقائی کشیدگی کے اثرات کا بھی جائزہ لیا جا رہا ہے۔
یہ بھی پڑھیں:عالمی منڈیاں غیر یقینی کا شکار، تیل اور سونا مہنگا
رئیل اسٹیٹ کے شعبے کو سہارا دینے کیلئے ٹیکس میں نرمی اور اوورسیز پاکستانیوں کو مراعات دینے کی تجاویز زیر غور ہیں، تاہم ان کی منظوری آئی ایم ایف کی رضا مندی سے مشروط ہوگی۔
معاشی ماہرین کا کہنا ہے کہ اگر پیٹرولیم لیوی میں اضافہ کیا گیا تو اس کے اثرات براہ راست مہنگائی پر پڑیں گے، جس سے عام آدمی کی مشکلات میں مزید اضافہ ہو سکتا ہے۔
