رپورٹ کے مطابق امریکی صدرٹرمپ کے بیان کے بعد امریکی کروڈآئل کی قیمت میں 10 فیصد کمی آئی جس کے بعد عالمی مارکیٹ میں امریکی خام تیل کی قیمت 88.34 ڈالرفی بیرل پرآگئی۔
اسی طرح عالمی مارکیٹ میں برطانوی خام تیل کی قیمت میں بھی 10فیصد کمی دیکھنے میں آئی، قیمت میں کمی کے بعد برینٹ کروڈ آئل 101.49 ڈالر فی بیرل پرآگیا۔
واضح رہے کہ امریکی صدر ڈونلڈ ٹرمپ نے ایران کے پاور پلانٹس اور توانائی تنصیبات پر 5 روز کے لیے حملے روکنے کا حکم دے دیا۔
سماجی رابطوں کی ویب سائٹ ٹروتھ سوشل پر جاری ایک پیغام میں امریکی صدر ڈونلڈ ٹرمپ کا کہنا تھا کہ ایران کے ساتھ جنگ کے مکمل خاتمے کے لئے بات چیت ہوئی ہے، بات چیت کا مقصد مشرق وسطیٰ میں کشیدگی کا مکمل خاتمہ ہے۔
یہ بھی پڑھیں: ٹرمپ کا ایرانی پاور پلانٹس اور توانائی تنصیبات پر حملے روکنے کا حکم
امریکی صدر نے کہا کہ میں ایران کے پاور پلانٹس اور توانائی کی تنصیبات پر 5 روز کے لئے حملے روکنے کا کہہ رہا ہوں، اس دوران مذاکرات کا عمل جاری رہے گا، یہ فیصلہ جاری بات چیت کی کامیابی سے مشروط ہے اور اگر مذاکرات مثبت سمت میں آگے بڑھتے رہے تو مزید پیش رفت کا امکان ہے۔
ادھر روس نے بھی ایران کے ساتھ جاری تنازعات کو سیاسی اور سفارتی طریقوں سے طے کرنے پر زور دیا ہے۔
ترجمان کریملن دمتری پیسکوف نے کہا کہ مشرق وسطیٰ میں صورت حال کو بتدریج سیاسی اور سفارتی حل کی طرف لے جایا جائے، یہی طریقہ ہے جس کے ذریعے مؤثر طور پر خطرناک صورت حال میں بہتری لائی جا سکتی ہے۔
