مارکیٹ ذرائع کے مطابق مارکیٹ میں ایک تاوا گڈے کی قیمت 300 سے بڑھ کر 400 روپے تک جا پہنچی، ڈیڑھ تاوا گڈا 500 سے 600 روپے میں فروخت ہونے لگا جبکہ پتنگ کی قیمت بھی 400 سے بڑھ کر 500 روپے ہو گئی۔
اسی طرح چھوٹا گڈا بھی مارکیٹ میں قیمت 200 سے 300 روپے تک میں بیچا جا رہا ہے جبکہ ڈور کے پنوں کے ریٹس میں بھی بڑا اضافہ دیکھنے میں آیا ہے، 4 پیس پنہ 10 ہزار سے 12 ہزار روپے میں فروخت ہو رہا ہے ، 2 پیس ڈور کا پنہ 4500 سے بڑھ کر 5000 روپے میں دستیاب ہے۔
پتنگ بازی کے شائقین کا کہنا ہے کہ بسنت قریب آتے ہی پتنگ بازی مہنگا مشغلہ بن گیا ہے، پتنگوں ڈور اور گڈوں کی قیمتیں آسمان سے باتیں کر ہی ہیں۔
دوسری جانب کمشنر لاہور مریم خان نے ڈور اور گڈوں کے سرکاری ریٹ نوٹیفائی کرنے کا عندیہ دے دیا۔
یہ بھی پڑھیں: بسنت کے موقع پر شہریوں کیلئے مفت ٹرانسپورٹ پلان فائنل
کمشنر لاہور مریم خان نے موچی گیٹ بازار کا دورہ کیا جہاں گفتگو کرتے ہوئے انہوں نے کہ آج پہلا روز ہے لاہوریوں کی بڑی تعداد خریداری کے لئے نکلی ہے ، مارکیٹ میں ڈیمانڈ اینڈ سپلائی میں فرق کے باعث قیمتوں میں اتار چڑھاؤ آیا۔
انہوں نے بتایا کہ لاہور میں 2 ہزار سے زائد رجسٹرڈ پوائنٹ ہیں، تمام رجسٹرڈ پوائنٹس کی لوکیشن کے ساتھ تفصیلات پورٹل پر موجود ہیں، کل سے لاہو ر میں سپلائی بہتر ہو جائے گی، سپلائی کے بعد قیمتوں میں استحکام آجائے گا۔
کمشنر لاہور کا کہنا تھا کہ اگر ضرورت پڑی تو ضلعی انتظامیہ گڈوں، پتنگوں اور ڈور کے ریٹس کا نوٹیفکیشن جاری کر دے گی۔
