بلومبرگ نے پاکستان میں مہنگائی میں نمایاں بہتری اور پالیسی استحکام کی تصدیق کر دی۔
رپورٹ میں کہا گیا ہے کہ پاکستان میں قیمتوں کا استحکام اور معاشی نظم و نسق بہتر ہو رہا ہے، دسمبر میں افراطِ زر 5.6 فیصد رہا جو توقعات اور نومبر کے 6.1 فیصد سے کم ہے، خوراک کی قیمتوں میں دباؤ کم ہوا اور غذائی افراطِ زر 3.24 فیصد تک محدود رہا۔
بلوم برگ کے مطابق پاکستان میں خوراک کی بہتر دستیابی سے مارکیٹ میں استحکام آیا اور عوامی ریلیف کے آثار نمایاں ہوئے، مارکیٹ اندازوں سے کم مہنگائی نے اعتماد بڑھایا اور پالیسی سمت کی تصدیق کی۔
یہ بھی پڑھیں: نئے سال کے آغاز پر اسٹاک مارکیٹ کی لمبی چھلانگ
رپورٹ میں کہا گیا کہ اسٹیٹ بینک آف پاکستان نے استحکام کو مدنظر رکھتے ہوئے پالیسی ریٹ تقریباً تین سال کی کم ترین سطح پر کیا، شرحِ سود میں 50 بیسز پوائنٹس کی کمی سے قیمتوں کے دباؤ کے قابلِ کنٹرول ہونے کا واضح اشارہ ملا۔
بلوم برگ کے مطابق کم شرحِ سود سے کاروبار اور سرمایہ کاری کے لیے فنانسنگ نسبتاً سازگار ہونے کی امید بڑھی، قیمتوں کے استحکام نے سرمایہ کاری کے ماحول کے لیے مثبت سگنل دیا اور غیر یقینی صورتحال میں کمی آئی، کم مہنگائی سے قوتِ خرید میں بہتری اور صارفین کے لیے ریلیف کے امکانات بڑھے۔
رپورٹ میں مزید کہا گیا کہ دسمبر کے اعداد و شمار سے ظاہر ہوا کہ پالیسی اقدامات کے نتائج سامنے آنا شروع ہو گئے ہیں، مہنگائی کا مسلسل نیچے آنا مڈ ٹرم معاشی استحکام اور بہتر گورننس کی بنیاد مضبوط ہونے کا اشارہ ہے۔
یہ بھی دیکھیں: نئے سال کا تحفہ، حکومت نے پٹرولیم مصنوعات سستی کردیں
دوسری جانب پاکستان شماریات بیورو نے بھی مہنگائی کے حوالے سے ماہانہ رپورٹ جاری کر دی۔
رپورٹ کے مطابق دسمبر میں مہنگائی میں 0.4 فیصد کی کمی ہوئی ،ملک میں ماہ دسمبر کے دوران مہنگائی کی شرح 5.6 فیصد ریکارڈ کی گئی، نومبر 2025 میں مہنگائی 6.1 فیصد اور دسمبر 2024 میں 4.1 فیصد تھی۔
ادارہ شماریات کے مطابق رواں مالی سال کے پہلے چھ ماہ میں افراط زر 5.15 فیصد ریکارڈ کی گئی ، ملک کے شہری علاقوں میں دسمبر میں مہنگائی 5.8 فیصد جبکہ دیہی علاقوں میں 5.4 فیصد ریکارڈ کی گئی۔
اس کو بھی پڑھیں: نئے سال کے پہلے روز عالمی و ملکی بازاروں میں سونا ہزاروں روپے سستا
رپورٹ میں بتایا گیا کہ دسمبرمیں پھل 6.78 فیصد، گندم 3.48 فیصد اور خشک میوہ جات 3.29 فیصد مہنگے ہو گئے ، ایک ماہ میں انڈے 3.27 فیصد، خوردنی تیل 2.84 فیصد اور خشک دودھ اور آٹا 2 فیصد مہنگے ہو ئے۔
