آل پاکستان جیمز اینڈ جیولرز ایسوسی ایشن کے مطابق ملکی صرافہ مارکیٹوں میں آج 24 قیراط کے حامل فی تولہ سونے کی قیمت میں ایک ہزار 900 روپے کی کمی آگئی جس کے بعد ملکی صرافہ بازاروں میں اونس سونے کا بھاؤ 4 لاکھ 41 ہزار 862 پر آگیا۔

جیولرز ایسوسی ایشن کی جانب سے بتایا گیا کہ ملکی صرافہ مارکیٹوں میں 24 قیراط کے حامل 10 گرام سونے کی قیمت میں بھی کمی دیکھنے میں آئی، پاکستان میں 10 گرام سونے کی قیمت ایک ہزار 629 روپے کی کمی سے 3 لاکھ 78 ہزار 825 روپے ہو گئی۔

دوسری جانب بین الاقوامی صرافہ مارکیٹوں میں بھی سونے کے نرخوں میں 19 ڈالر فی اونس کی کمی ہوئی جس کے بعد عالمی صرافہ بازاروں میں فی اونس سونا 4 ہزار 195 ڈالر کا ہو گیا۔

یہ بھی پڑھیں: سونے کی قیمتوں میں ایک بار پھر بڑی کمی

یاد رہے کہ گزشتہ روز ملکی صرافہ مارکیٹوں میں فی تولہ سونے کی قیمت میں 1600 روپے کا اضافہ ریکارڈ کیا گیا تھا جس کے بعد ملکی سطح پر فی تولہ سونے کی قیمت 4 لاکھ 43 ہزار 762 روپے جبکہ 10 گرام سونے کی قیمت 3 لاکھ 80 ہزار 454 روپے تک پہنچ گئی تھی۔

ادھر ملکی صرافہ بازاروں میں چاندی کے بھاؤ میں آج استحکام رہا، ملکی صرافہ مارکیٹوں میں فی تولہ چاندی کی قیمت 6 ہزار 102 روپے اور 10 گرام چاندی کی قیمت 5 ہزار 231روپے پر مستحکم رہی۔