ایران جنگ جلد ختم ہو جائے گی، ڈونلڈ ٹرمپ
امریکی صدر ڈونلڈ ٹرمپ نے آئرلینڈ کا دورہ کیا، جہاں انہوں نے آئرلینڈ کے صدر سے ملاقات کی۔ ملاقات کے دوران دونوں رہنماؤں کے درمیان باہمی تجارت سمیت دیگر اہم امور پر گفتگو ہوئی۔
بعد ازاں میڈیا سے گفتگو کرتے ہوئے ڈونلڈ ٹرمپ نے کہا کہ امریکا اور آئرلینڈ مل کر بہترین کام کر رہے ہیں، ایران جنگ بہت جلد ختم ہو جائے گی اور جنگ کے خاتمے کے بعد تیل کی قیمتوں میں نمایاں کمی متوقع ہے۔
میڈیا سے گفتگو کے دوران ایک صحافی نے امریکی صدر سے سوال کیا کہ سعودی عرب سے متعلق تازہ خدشات کے تناظر میں کیا امریکا آبنائے ہرمز سے آمدورفت بحال کرانے میں مدد کر سکتا ہے؟
اس سوال کے جواب میں ڈونلڈ ٹرمپ نے کہا کہ سعودی ولی عہد ان کے اچھے دوست ہیں اور سب کچھ ٹھیک ہو جائے گا۔
انہوں نے سعودی عرب کی پائپ لائن پر حملے کا ذمہ دار ایران کو قرار دیتے ہوئے کہا کہ حوثی امریکا کے ساتھ لڑائی نہیں چاہتے۔
یہ بھی پڑھیں:کارگو جہاز میں آگ لگ گئی، 25 افراد ہلاک
ٹرمپ کے بیان کے بعد عالمی توانائی مارکیٹ میں ایران جنگ، آبنائے ہرمز کی صورتحال اور تیل کی قیمتوں میں ممکنہ تبدیلیوں پر توجہ مزید بڑھ گئی ہے۔ اگر خطے میں کشیدگی کم ہوتی ہے تو عالمی سطح پر تیل کی سپلائی اور قیمتوں پر اس کے اثرات مرتب ہونے کا امکان ہے۔
