رمضان المبارک 2027 کب شروع ہوگا؟ متوقع تاریخ سامنے آگئی
تفصیلات کے مطابق بین الاقوامی فلکیاتی مرکز کے حسابات کی روشنی میں رمضان المبارک 1448 ہجری کا آغاز پیر 8 فروری 2027 کو ہونے کا امکان ہے۔
فلکیاتی اندازوں کے مطابق رمضان المبارک کا چاند ہفتہ 6 فروری 2027 کو عالمی وقت کے مطابق رات 3 بج کر 56 منٹ پر پیدا ہوگا۔
چاند کی رویت سے متعلق فلکیاتی حسابات 6 اور 7 فروری کیلئے کیے گئے ہیں، جبکہ پہلے سے مرتب ہجری کیلنڈر کے مطابق 8 فروری کو رمضان المبارک کا پہلا روزہ متوقع ہے۔ اگر سرکاری کیلنڈر فلکیاتی اندازوں کے مطابق رہا تو متحدہ عرب امارات میں اسی تاریخ سے روزے شروع کیے جائیں گے، تاہم حتمی اعلان چاند نظر آنے کے بعد ہی کیا جائے گا۔
رمضان المبارک کے اختتام کے بعد عیدالفطر کی تاریخ کا انحصار رمضان کے 29 یا 30 دن مکمل ہونے پر ہوگا۔ فلکیاتی مرکز کے مطابق شوال کا چاند پیر 8 مارچ 2027 کو عالمی وقت کے مطابق صبح 9 بج کر 29 منٹ پر پیدا ہوگا۔ اگر 8 مارچ کو چاند نظر آگیا اور رمضان 29 دن کا ہوا تو عیدالفطر منگل 9 مارچ کو ہوسکتی ہے، جبکہ رمضان 30 دن مکمل ہونے کی صورت میں عیدالفطر بدھ 10 مارچ کو ہونے کا امکان ہے۔
دوسری جانب فلکیاتی حسابات کے مطابق متحدہ عرب امارات میں عیدالاضحیٰ 2027 بھی مئی میں متوقع ہے۔ ذوالحجہ کے چاند کی پیدائش جمعرات 6 مئی 2027 کو عالمی وقت کے مطابق صبح 10 بج کر 59 منٹ پر ہوگی۔ چاند کی رویت سے متعلق حسابات 6 اور 7 مئی کیلئے کیے گئے ہیں۔
موجودہ اندازوں کے مطابق یکم ذوالحجہ 7 یا 8 مئی کو ہوسکتا ہے، جبکہ یوم عرفہ 15 یا 16 مئی کو متوقع ہے۔ اسی حساب سے عیدالاضحیٰ، جو ذوالحجہ کی 10 تاریخ کو منائی جاتی ہے، 16 یا 17 مئی 2027 کو ہونے کا امکان ظاہر کیا گیا ہے۔
یہ بھی پڑھیں:ایران نے امریکی اڈوں پر جوابی حملہ کر دیا
واضح رہے کہ متحدہ عرب امارات میں 2027 کے اسلامی تہواروں اور سرکاری تعطیلات کی حتمی تاریخوں کا تعین چاند کی رویت کے بعد کیا جائے گا، اس لیے فلکیاتی تاریخوں کو فی الحال متوقع تاریخیں سمجھا جائے۔
