جاپان میں 5.8 شدت کا زلزلہ، متعدد افراد زخمی
جرمن ریسرچ سینٹر کے مطابق زلزلے کا مرکز ہونشو کے مشرقی ساحلی علاقے کے قریب زمین سے تقریباً 78 کلومیٹر گہرائی میں تھا۔ زلزلے کے جھٹکے محسوس ہوتے ہی شہریوں میں خوف و ہراس پھیل گیا اور کئی افراد احتیاطاً گھروں اور عمارتوں سے باہر نکل آئے۔
جاپانی حکام کے مطابق زلزلے کے باعث متعدد افراد کو معمولی نوعیت کے زخم آئے ہیں، تاہم فوری طور پر کسی بڑے جانی نقصان کی اطلاع سامنے نہیں آئی۔ متاثرہ علاقوں میں صورتحال کا جائزہ لینے کیلئے متعلقہ اداروں کی جانب سے نگرانی اور امدادی سرگرمیاں جاری رکھی گئیں۔
زلزلے کے بعد بعض علاقوں میں ٹرین سروس بھی عارضی طور پر معطل کردی گئی تاکہ ریلوے ٹریکس اور تنصیبات کا معائنہ کیا جاسکے۔ حکام کی جانب سے ممکنہ نقصانات کا جائزہ لینے کے بعد ٹرین آپریشن معمول پر لانے کے اقدامات کیے جارہے ہیں۔
جاپان محکمہ موسمیات کے مطابق زلزلے کے بعد شہریوں کو محتاط رہنے کی ہدایت کی گئی ہے، جبکہ آنے والے دنوں میں آفٹر شاکس کے امکان کو بھی نظر انداز نہیں کیا جاسکتا۔
محکمہ موسمیات نے پیشگوئی کی ہے کہ ایک ہفتے کے دوران 5 شدت سے کم کا ایک اور زلزلہ محسوس ہوسکتا ہے۔ حکام نے شہریوں پر زور دیا ہے کہ وہ کسی بھی ہنگامی صورتحال سے نمٹنے کیلئے ضروری احتیاطی تدابیر اختیار کریں اور سرکاری ہدایات پر عمل کریں۔
یہ بھی پڑھیں:معروف عالمِ دین مولانا طلحہ رضوی قاتلانہ حملے میں جاں بحق
جاپان دنیا کے ان ممالک میں شامل ہے جہاں زلزلے معمول کا حصہ ہیں، تاہم جدید عمارتوں اور ہنگامی نظام کے باعث بڑے نقصانات سے نمٹنے کے لیے خصوصی انتظامات کیے جاتے ہیں۔
