عمرہ زائرین کیلئے اہم ہدایات جاری
سعودی جنرل اتھارٹی کے مطابق مسجد الحرام میں رش کی صورتحال دن کے مختلف اوقات میں تبدیل ہوتی رہتی ہے، اس لیے زائرین کو چاہیے کہ وہ عبادات اور مناسک کی ادائیگی کیلئے پہلے سے مناسب وقت کا انتخاب کریں تاکہ مطاف اور مسعی میں آمدورفت زیادہ آسانی سے ہوسکے۔
حکام کے مطابق رات 10 بجے سے صبح 4 بجے تک جبکہ صبح 9 بجے سے شام 4 بجے تک مسجد الحرام میں رش نسبتاً کم رہتا ہے۔ اسی طرح صبح 5 بجے سے 8 بجے تک رش درمیانے درجے کا ہوتا ہے، جبکہ شام 5 بجے سے رات 9 بجے تک مسجد الحرام میں زائرین کی تعداد زیادہ ہونے کے باعث رش کی صورتحال زیادہ ہوتی ہے۔
سعودی حکام نے عمرہ زائرین کو مشورہ دیا ہے کہ رش سے بچنے کیلئے اپنے عبادتی معمول کی پہلے سے منصوبہ بندی کریں۔ زائرین مسجد الحرام میں دستیاب ڈیجیٹل سہولیات اور لائیو رش کی صورتحال سے بھی فائدہ اٹھا سکتے ہیں تاکہ طواف اور سعی کیلئے موزوں وقت کا انتخاب کیا جاسکے۔
اتھارٹی کا کہنا ہے کہ مناسب اوقات میں طواف اور سعی کی منصوبہ بندی سے نہ صرف ہجوم کو منظم کرنے میں مدد ملتی ہے بلکہ زائرین کو مسجد الحرام میں آمدورفت کے دوران بھی زیادہ سہولت حاصل ہوتی ہے۔ اس اقدام کا بنیادی مقصد عبادت کے دوران رش کو کم کرنا اور مقدس مقام پر زائرین کیلئے پرسکون اور محفوظ ماحول فراہم کرنا ہے۔
رپورٹس کے مطابق موجودہ عمرہ سیزن کے ابتدائی ڈیڑھ ماہ کے دوران 9 لاکھ 20 ہزار 500 عمرہ زائرین سعودی عرب پہنچ چکے ہیں۔ گزشتہ ماہ جاری کیے گئے اعدادوشمار میں عمرہ ویزے پر مملکت آنے والے افراد کی تعداد میں 22.5 فیصد اضافہ بھی ریکارڈ کیا گیا تھا۔
یہ بھی پڑھیں:کیرولین لیویٹ کے استعفے کی اصل وجہ کیا؟ بڑا دعویٰ سامنے آگیا
زائرین کی بڑھتی ہوئی تعداد کے پیش نظر سعودی حکام نے زور دیا ہے کہ پیشگی منصوبہ بندی سفر اور عبادات کو آسان بنانے میں اہم کردار ادا کرتی ہے۔ مناسب اوقات کا انتخاب کرکے زائرین نہ صرف رش سے بچ سکتے ہیں بلکہ مناسک بھی زیادہ سہولت کے ساتھ ادا کرسکتے ہیں۔
