الجیریا میں خوفناک بس حادثہ، 25 افراد ہلاک، 44 زخمی
اس افسوسناک حادثے کے نتیجے میں کم از کم 25 افراد ہلاک جبکہ 44 افراد زخمی ہو گئے، جن میں متعدد کی حالت تشویشناک بتائی جا رہی ہے۔
رپورٹس کے مطابق بس سیطیف سے دارالحکومت الجزائر کی جانب جا رہی تھی کہ اچانک ڈرائیور گاڑی پر قابو نہ رکھ سکا، جس کے باعث بس سڑک سے نیچے جا گری اور کئی بار الٹنے کے بعد شدید تباہی کا شکار ہو گئی۔
حادثے کی اطلاع ملتے ہی سول ڈیفنس، پولیس اور ریسکیو ٹیمیں فوری طور پر جائے وقوعہ پر پہنچ گئیں اور امدادی کارروائیاں شروع کر دیں۔
ریسکیو اہلکاروں نے زخمیوں کو نکال کر قریبی ہسپتالوں میں منتقل کیا، جہاں متعدد افراد کو انتہائی نگہداشت کے وارڈ میں رکھا گیا ہے، ڈاکٹروں کے مطابق بعض زخمیوں کی حالت نازک ہونے کے باعث ہلاکتوں میں اضافے کا خدشہ موجود ہے۔
الجزائری حکام نے ہلاک ہونے والے افراد کی شناخت کا عمل شروع کر دیا ہے جبکہ متاثرہ خاندانوں کو اطلاع بھی دی جا رہی ہے۔ حکومت نے حادثے کی مکمل تحقیقات کا حکم دیتے ہوئے متعلقہ اداروں کو رپورٹ جلد از جلد پیش کرنے کی ہدایت کی ہے۔
یہ بھی پڑھیں:امریکا کا ایف -35 لڑاکا طیارہ گر کر تباہ ہوگیا
ابتدائی تحقیقات کے مطابق حادثے کی ممکنہ وجوہات میں تیز رفتاری، ڈرائیور کا گاڑی پر قابو کھو دینا یا سڑک کی خراب حالت شامل ہو سکتی ہیں، تاہم حتمی وجہ تحقیقات مکمل ہونے کے بعد سامنے آئے گی۔
