ڈھاکہ: سیلاب نے تباہی مچا دی، 62 افراد جاں بحق جبکہ 12 لاکھ سے زائد متاثر
رپورٹس کے مطابق قدرتی آفت کے نتیجے میں اب تک 62 افراد جاں بحق جبکہ 12 لاکھ 17 ہزار سے زائد افراد متاثر ہو چکے ہیں۔
بنگلہ دیش کی وزارتِ ڈیزاسٹر مینجمنٹ اینڈ ریلیف کی رپورٹ میں بتایا گیا کہ سات اضلاع کھگراچاری، رنگامتی، بندربن، کاکس بازار، چٹاگانگ، مولوی بازار اور حبی گنج بری طرح متاثر ہوئے ہیں۔ ان اضلاع کے 57 اپیزلا، 362 یونین کونسلیں اور 8 میونسپلٹیز سیلاب کی لپیٹ میں آ چکی ہیں، جبکہ 52 ہزار 493 خاندانوں کے گھر زیرِ آب آ گئے ہیں۔
رپورٹ کے مطابق جاں بحق ہونے والوں میں 3 افراد رنگامتی، 7 بندربن، 32 کاکس بازار (جن میں 19 مقامی شہری اور 13 روہنگیا پناہ گزین شامل ہیں)، 15 چٹاگانگ اور دیگر مولوی بازار سے تعلق رکھتے ہیں۔ اس کے علاوہ کم از کم 50 افراد زخمی بھی ہوئے ہیں، جنہیں مختلف اسپتالوں میں طبی امداد فراہم کی جا رہی ہے۔
وزارتِ ڈیزاسٹر مینجمنٹ کے مطابق حکومت نے متاثرہ علاقوں میں امدادی سرگرمیاں تیز کر دی ہیں، متاثرین کو خوراک، پینے کا صاف پانی، نقد امداد اور دیگر ضروری اشیا فراہم کی جا رہی ہیں، جبکہ مقامی انتظامیہ، فوج، ریسکیو ادارے اور رضاکار تنظیمیں مشترکہ طور پر امدادی کارروائیوں میں مصروف ہیں۔
یہ بھی پڑھیں:چھوٹے تاجروں کیلئے فکسڈ ٹیکس اسکیم، طریقہ کار جاری
وزارت کا کہنا ہے کہ سیلابی صورتحال کی 24 گھنٹے نگرانی کی جا رہی ہے اور ضرورت پڑنے پر مزید مالی وسائل اور امدادی سامان فراہم کیا جائے گا۔
حکام نے شہریوں کو نشیبی علاقوں سے محفوظ مقامات پر منتقل ہونے اور احتیاطی تدابیر اختیار کرنے کی ہدایت بھی جاری کی ہے۔
