یوکرین: وزیراعظم یولیا سویریڈنکو عہدے سے برطرف، کابینہ تحلیل
عالمی خبر رساں ادارے کی رپورٹ کے مطابق یوکرینی صدر ولادیمیر زیلنسکی نے سماجی رابطوں کی ویب سائٹ ایکس (سابقہ ٹویٹر) پر جاری ایک بیان میں کہا کہ میں وزیراعظم یولیا سویریڈنکو کی خدمات کا معترف ہوں اور انہیں ایک نئی ذمہ داری کی پیشکش کی گئی ہے۔
صدر زیلنسکی کا کہنا تھا کہ پارلیمان کے تعاون سے حکومت میں ضروری ردوبدل کیا جائے گا ، تاہم انہوں نے یہ واضح نہیں کیا کہ ملک کا نیا وزیراعظم کون ہو گا یا سابق وزیراعظم یولیا سویریڈنکو کو کونسی نئی ذمہ داریاں تفویض کی جا رہی ہیں۔
یوکرینی صدر کا یہ بھی کہنا تھا کہ قانون نافذ کرنے والے اداروں کی قیادت میں بھی تبدیلیاں کی جائیں گی، تاہم انہوں اس کی وجوہات بیان نہیں کیں۔
خیال رہے کہ یولیا سویریڈنکو پیشے کے اعتبار سے ماہر معاشیات ہیں اور انہوں نے گزشتہ برس جولائی 2025 میں وزیراعظم کا منصب سنبھالا تھا۔
اس سے قبل انہوں نے ایک سال تک صدر زیلنسکی کے دفتر میں بطور نائب سربراہ ذمہ داریاں نبھائیں، جبکہ چار برس تک وہ نائب وزیراعظم اور وزیر برائے اقتصادی ترقی و تجارت کے طور پر بھی فرائض انجام دیتی رہیں۔
یہ بھی پڑھیں: دنیا کے امیر ترین ممالک کون سے ہیں؟ نئی فہرست آگئی
یوکرین کے آئین کے مطابق وزیراعظم کے استعفے کی منظوری پارلیمنٹ دیتی ہے اور وزیراعظم کے مستعفی ہونے کے ساتھ ہی پوری کابینہ بھی تحلیل ہو جاتی ہے۔
پارلیمانی ذرائع کے مطابق وزارت توانائی کے وزیر ڈینس شمیہال، وزیر دفاع میخائیلو فیڈوروف اور سرکاری توانائی کمپنی نفتوگاز کے سربراہ سرہی کوریٹسکی ممکنہ طور پر وزیراعظم کے عہدے کی دوڑ میں شامل ہو سکتے ہیں۔
