روس نے اپنا جدید ڈومز ڈے کمانڈ سینٹر طیارہ تہران بھیج دیا
میڈیا رپورٹس کے مطابق روس نے اپنا جدید ترین ڈومز ڈے کمانڈ سینٹر طیارہ ٹی یو-214 پی یو (Tu-214PU) ایران کے دارالحکومت تہران بھیج دیا ہے، جسے جنگی حالات میں انتہائی اہم طیارہ تصور کیا جاتا ہے۔
رپورٹس کے مطابق اس طیارے کو اڑتا ہوا کمانڈ سینٹر بھی کہا جاتا ہے، کیونکہ یہ ہنگامی صورتحال یا بڑے فوجی تنازع کے دوران اعلیٰ قیادت اور فوجی کمانڈرز کو محفوظ مقام سے رابطہ برقرار رکھنے اور آپریشنز کی نگرانی میں مدد فراہم کرتا ہے۔
یہ پیش رفت ایسے وقت میں سامنے آئی ہے جب ایران اور امریکا کے درمیان کشیدگی میں اضافہ ہوا ہے اور خطے میں ممکنہ فوجی تصادم کے خدشات بڑھ گئے ہیں۔
میڈیا رپورٹس میں دعویٰ کیا گیا ہے کہ حالیہ واقعات جن میں آبنائے ہرمز کے علاقے میں بحری سرگرمیاں اور حملوں کے الزامات شامل ہیں کے بعد صورتحال مزید پیچیدہ ہو گئی ہے۔
روسی طیارے کی تہران آمد کو بعض مبصرین ماسکو اور تہران کے بڑھتے ہوئے تعلقات کی علامت قرار دے رہے ہیں۔ ان کے مطابق اس اقدام کے ذریعے روس ایران کے ساتھ فوجی معلومات کے تبادلے، حکمت عملی پر مشاورت یا کسی ہنگامی صورتحال سے نمٹنے کیلئے تعاون کر سکتا ہے۔
یہ بھی پڑھیں:آیت اللہ خامنہ ای کی نمازِ جنازہ میں نظر آنے والا پراسرار نقاب پوش کون تھا؟ شناخت ہوگئی
دوسری جانب عالمی برادری کی نظریں مشرقِ وسطیٰ کی صورتحال پر مرکوز ہیں، کیونکہ خطے میں کسی بھی نئی کشیدگی کے اثرات عالمی سیاست، توانائی کی منڈی اور سیکیورٹی صورتحال پر پڑ سکتے ہیں۔
