چین: جوتا ساز فیکٹری میں آگ لگ گئی، 28 افراد ہلاک
عالمی میڈیا رپورٹس کے مطابق فوجیان کے شہر جنجیان کے علاقے چنڈائی ٹاؤن شپ کے جیانگتو گاؤں میں واقع شوز فیکٹری میں مقامی وقت کے مطابق دوپہر تقریباً 12 بج کر 4 منٹ پر آگ بھڑک اٹھی جس نے دیکھتے ہی دیکھتے عمارت کے کئی حصوں کو اپنی لپیٹ میں لے لیا۔
رپورٹس کے مطابق حادثے کے وقت فیکٹری کی عمارت میں 237 ورکرز اور 2 وزیٹرز موجود تھے، ریسکیو عملے نے 213 افراد کو عمارت سے نکال لیا تاہم 28 افراد جان کی بازی ہار گئے ۔
رپورٹس کے مطابق آگ پر قابو پانے کے لیے قریبی شہر کوانژو سے 183 فائر فائٹرز اور 35 فائر ٹرکس جائے وقوعہ پر روانہ کیے گئے، کئی گھنٹوں کی جدوجہد کے بعد آگ پر قابو پا لیا گیا۔
سوشل میڈیا پر سامنے آنے والی ویڈیوز میں فیکٹری سے بلند شعلے اور گہرا سیاہ دھواں اٹھتا دکھائی دیا جبکہ بعض افراد چھت پر پھنسے ہوئے مدد کے لیے اشارے کرتے بھی نظر آئے۔
چینی صدر شی جن پنگ نے واقعے پر گہرے دکھ کا اظہار کرتے ہوئے حکام کو ہدایت کی کہ پھنسے ہوئے افراد کی تلاش، زخمیوں کے علاج اور متاثرہ خاندانوں کی امداد میں کوئی کسر نہ چھوڑی جائے۔
یہ بھی پڑھیں: کابل یونیورسٹی کے طلبہ ہاسٹل میں دھماکہ، 20 طلبہ زخمی
انہوں نے حادثے کی وجوہات کے تعین کے لیے فوری تحقیقات اور ذمہ داروں کے خلاف سخت کارروائی کا حکم بھی دیا۔
چینی سرکاری خبر ایجنسی کے مطابق فیکٹری کے مالک اور انتظامیہ سے تعلق رکھنے والے دیگر ذمہ دار افراد کو گرفتار کر لیا گیا ہے جبکہ کمپنی کے اکاؤنٹس بھی منجمد کر دیے گئے ہیں۔
رپورٹس کے مطابق تاحال آگ لگنے کی اصل وجہ سامنے نہیں آ سکی اور حکام مختلف پہلوؤں سے تحقیقات کر رہے ہیں۔
