شہید ایرانی سپریم لیڈر آیت اللہ خامنہ ای کا جسد خاکی نماز جنازہ کیلئے تہران منتقل
ایرانی میڈیا کے مطابق آیت اللہ خامنہ ای کی نماز جنازہ کل تہران میں ادا کی جائے گی جس میں بڑی تعداد میں غیر ملکی مندوبین کے ساتھ ایک کروڑ افراد کی شرکت کا امکان ہے۔
میڈیا رپورٹس کے مطابق آیت اللہ خامنہ ای کے جسد خاکی کو آخری رسومات کے لیے تہران منتقل کر دیا گیا ہے، ان کی نماز جنازہ گرینڈ مسلہ کمپلیکس میں ادا کی جائے گی۔
یہ بھی پڑھیں: آیت اللہ خامنہ ای کی نمازِ جنازہ میں پاکستان سے کون شرکت کرے گا؟
شہید سپریم لیڈر کے جسد خاکی کو نماز جنازہ کے بعد قم، نجف اور کربلا لیکر جایا جائے گا اور پھر میت واپس ایران لا کر آیت اللہ علی خامنہ ای کو مشہد میں سپردِ خاک کیا جائے گا۔
دوسری جانب ایران کے خاتم الانبیا بریگیڈ نے خبردار کیا ہے کہ اسرائیل یا امریکا نے شہید سپریم لیڈر آیت اللہ خامنہ ای کے جنازے کے دوران حملہ کیا تو ایرانی جواب نہایت سخت ہوگا۔
خاتم الانبیا بریگیڈ نے اپنے بیان میں کہا کہ مخالفین شہید سپریم لیڈر آیت اللہ خامنہ ای کے جنازے کے دوران حملے سے پہلے دو بار سوچ لیں۔
ادھر ایرانی صدر مسعود پزشکیان کا کہنا ہےکہ آیت اللہ خامنہ ای کی شہادت سفر کا اختتام نہیں ، بلکہ ایک نئے باب کا آغاز ہے، شہید سپریم لیڈر کی وراثت اورپیغام ہمیشہ رہے گا، ایرانی صدر نے نمازے جنازہ سے قبل جاری پیغام میں کہا کہ ایران کا مستقبل قومی اتحادکے ذریعے ہی محفوظ بنایا جاسکتا ہے۔
