امریکا میں دورانِ پرواز چھوٹا طیارہ گر کر تباہ
حکام کے مطابق دونوں زخمیوں کو فوری طور پر ریسکیو کارروائی کے بعد ایئرلفٹ کرکے اسپتال منتقل کر دیا گیا، جہاں انہیں طبی امداد فراہم کی جا رہی ہے۔
غیر ملکی میڈیا رپورٹس کے مطابق لنکاسٹر کاؤنٹی پولیس کا کہنا ہے کہ حادثے کے وقت طیارے میں صرف دو افراد موجود تھے، جن کے بارے میں ابتدائی طور پر خیال ظاہر کیا جا رہا ہے کہ وہ دونوں پائلٹ تھے۔ زخمی افراد جائے حادثہ کے قریب سے ملے، جس کے بعد امدادی ٹیموں نے فوری کارروائی کرتے ہوئے انہیں محفوظ مقام پر منتقل کیا۔
امریکی فیڈرل ایوی ایشن ایڈمنسٹریشن (ایف اے اے) کے مطابق حادثے کا شکار ہونے والا طیارہ بیچ کرافٹ بی ای 55 ماڈل کا تھا۔ حکام نے بتایا کہ طیارے نے اپنی پرواز ریاست مسیسپی کے پوپلارویل پرل کاؤنٹی ایئرپورٹ سے شروع کی تھی اور اسے شمالی کیرولینا کے اسٹینلی کاؤنٹی ایئرپورٹ پہنچنا تھا، تاہم منزل تک پہنچنے سے پہلے ہی یہ حادثے کا شکار ہو گیا۔
حادثے کے بعد پولیس، فائر بریگیڈ اور ریسکیو اداروں نے فوری طور پر جائے وقوعہ کو گھیرے میں لے کر امدادی کارروائیاں مکمل کیں، جبکہ ملبے کا بھی جائزہ لیا جا رہا ہے۔
یہ بھی پڑھیں:آیت اللہ خامنہ ای کی نمازِ جنازہ میں پاکستان سے کون شرکت کرے گا؟
فیڈرل ایوی ایشن ایڈمنسٹریشن نے واقعے کی باقاعدہ تحقیقات کا آغاز کر دیا، حکام کا کہنا ہے کہ طیارہ گرنے کی اصل وجہ جاننے کیلئے تکنیکی شواہد، موسم کی صورتحال اور پرواز سے متعلق تمام ریکارڈ کا تفصیلی جائزہ لیا جائے گا۔
