امریکا اور ایران کا مذاکرات جاری رکھنے پر اتفاق
ترجمان دفتر خارجہ کے مطابق آج دوحہ میں ہونے والے مذاکرات کے دوران پاکستانی اور قطری ثالثوں نے امریکی اور ایرانی وفود سے الگ الگ ملاقاتیں کیں، جن میں مختلف اہم امور پر تفصیلی تبادلہ خیال کیا گیا، مذاکرات میں مجموعی طور پر تعمیری اور مثبت پیش رفت ریکارڈ کی گئی۔
بیان میں کہا گیا کہ بات چیت میں ماضی کے مختلف اجلاسوں خصوصاً لیک لوسرن سربراہی اجلاس کے بعد پیدا ہونے والی پیش رفت کو آگے بڑھایا گیا اور باہمی اعتماد سازی کے اقدامات پر بھی غور کیا گیا۔ فریقین نے متعدد نکات پر لچک کا مظاہرہ کرتے ہوئے مستقبل میں تعاون جاری رکھنے کے عزم کا اظہار کیا۔
ترجمان دفتر خارجہ نے مزید بتایا کہ ابتدائی مرحلے میں یہ طے پایا ہے کہ ایرانی سپریم لیڈر کی تدفین کے بعد مذاکرات کے اگلے دور کی تاریخ کا اعلان کیا جائے گا۔ اس حوالے سے دونوں فریقین نے اس بات پر اتفاق کیا ہے کہ سفارتی عمل کو جاری رکھا جائے گا تاکہ اختلافی امور کو بات چیت کے ذریعے حل کیا جا سکے۔
یہ بھی پڑھیں:بحیرہ عرب میں امریکی بحریہ کا سی ہاک ہیلی کاپٹر گر کر تباہ
ذرائع کے مطابق قطر نے خطے میں کشیدگی کم کرنے اور سفارتی کوششوں کو آگے بڑھانے میں کلیدی کردار ادا کیا ہے، جبکہ پاکستان نے بھی مذاکراتی عمل کو مثبت سمت میں لے جانے کے لیے اپنا کردار ادا کیا ہے۔
