بحیرہ عرب میں امریکی بحریہ کا سی ہاک ہیلی کاپٹر گر کر تباہ
واقعے کے بعد فوری طور پر سرچ اینڈ ریسکیو آپریشن شروع کر دیا گیا، جس میں فضائی اور بحری وسائل استعمال کیے جا رہے ہیں۔
عرب میڈیا کے مطابق حادثہ دورانِ پرواز پیش آیا، جب ہیلی کاپٹر کو اچانک تکنیکی خرابی یا کسی ہنگامی صورتحال کا سامنا کرنا پڑا۔ عملے نے ہیلی کاپٹر کو بحیرہ عرب میں ہنگامی لینڈنگ کرانے کی کوشش کی، تاہم لینڈنگ کے دوران ہیلی کاپٹر شدید متاثر ہوا اور مکمل طور پر تباہ ہو گیا۔
امریکی بحری بیڑے نے بھی واقعے کی تصدیق کرتے ہوئے بتایا کہ ہیلی کاپٹر میں سوار عملے کے چار ارکان میں سے تین کو بحفاظت نکال لیا گیا، جبکہ ایک اہلکار اب بھی لاپتہ ہے۔ اس کی تلاش کیلئے سرچ اینڈ ریسکیو کارروائیاں مسلسل جاری ہیں اور امدادی ٹیمیں ہر ممکن کوشش کر رہی ہیں۔
امریکی بحریہ کے مطابق حادثے کی وجوہات جاننے کیلئے باضابطہ تحقیقات کا آغاز کر دیا گیا ہے۔ ابتدائی طور پر کسی ایک وجہ کی تصدیق نہیں کی گئی، تاہم تکنیکی خرابی سمیت تمام ممکنہ پہلوؤں کا جائزہ لیا جا رہا ہے، تحقیقات مکمل ہونے کے بعد ہی واقعے کی اصل وجہ سامنے آ سکے گی۔
دوسری جانب حکام نے لاپتہ اہلکار کی تلاش کو اولین ترجیح قرار دیتے ہوئے کہا ہے کہ جدید فضائی اور بحری وسائل کی مدد سے سرچ آپریشن جاری ہے۔ امریکی بحریہ نے فی الحال حادثے سے متعلق مزید تفصیلات جاری نہیں کیں۔
یہ بھی پڑھیں:عالمی منڈی میں خام تیل کی قیمتوں میں نمایاں کمی
یاد رہے کہ حالیہ دنوں دنیا کے مختلف حصوں میں فضائی حادثات میں اضافہ دیکھنے میں آیا ہے۔ گزشتہ اتوار فرانس کے شمال مشرقی علاقے میں اسکائی ڈائیونگ کیلئے جانے والا ایک چھوٹا طیارہ بھی گر کر تباہ ہو گیا تھا، جس کے نتیجے میں پائلٹ سمیت تمام 11 افراد ہلاک ہو گئے تھے۔
