سوشل میڈیا پلیٹ فارم ٹروتھ سوشل پر جاری اپنے بیان میں صدر ڈونلڈ ٹرمپ نے امریکی بحریہ کو حکم دیا کہ آبنائے ہرمز میں موجود چھوٹی ہو یا بڑی ہر کشتی کو نشانہ بنایا جائے۔

امریکی صدر ڈونلڈ ٹرمپ کا کہنا ہے کہ آبنائے ہرمز میں بارودی سرنگیں بچھانے والی ہر کشتی کو تباہ کر دیا جائے، کوئی ہچکچاہٹ نہیں ہے۔

انہوں نے کہا کہ دشمن کے تمام 159 بحری جہاز سمندر کی تہہ میں جا چکے ہیں، امریکی مائن سوئپرز آبنائے ہرمز کو صاف کرنے میں مصروف عمل ہیں۔

اپنے ایک اور بیان میں امریکی صدر ڈونلڈ ٹرمپ کا کہنا تھا کہ آبنائے ہرمز پر ہمارا مکمل کنٹرول ہے،امریکی بحریہ کی منظوری کے بغیر کوئی جہاز داخل یا نکل نہیں سکتا، آبنائے ہرمز اس وقت مکمل سیل ہے جب تک کہ ایران ڈیل کرنے کے قابل نہیں ہوتا۔

یہ بھی پڑھیں: ایران کیساتھ مذاکرات کا دوسرا دور جمعہ کو ہو سکتا ہے، ڈونلڈ ٹرمپ

انہوں نے کہا کہ ایران کو یہ معلوم کرنے میں بہت مشکل پیش آرہی ہے کہ ان کا لیڈر کون ہے، وہ صرف یہ نہیں جانتے، لڑائی سخت گیر اور اعتدال پسندوں کے درمیان ہے، سخت گیر مؤقف کے حامی میدان جنگ میں بری طرح شکست سے دوشار ہو رہے ہیں،سخت گیر ایرانی قیادت پاگل ہے وہ صرف عزت حاصل کرنے کی کوشش میں ہے۔