سماجی رابطوں کی ویب سائٹ ٹروتھ سوشل پر جاری ایک پیغام میں امریکی صدر ڈونلڈ ٹرمپ کا کہنا تھا کہ میرے نمائندے کل شام تک اسلام آباد پہنچ جائیں گے، ایران کو بہت اچھی ڈیل آفر کی ہے،میں سمجھتا ہوں امن معاہدہ ہو سکتا ہے۔

انہوں نے کہا کہ ایران سے دوستانہ یامشکل طریقے سےمعاہدہ ضرور ہو گا، یقین ہےہم ایک معاہدے تک پہنچنے کے قریب ہیں، اگر معاہدہ نہ ہوا تو ایران کے تمام بجلی گھروں اور پلوں کو تباہ کر دیں گے، معاہدہ نہ ہونے کی صورت میں ایران سے کسی قسم کی نرمی نہیں برتی جائے گی۔

امریکی صدر کا کہنا تھا کہ وقت آگیا ہے ایران سے لڑائی ختم کی جائے، امید ہے ایران ہماری تجاویز کو قبول کرے گا، ڈیل نہ ہونے کی صورت میں ایران کو ہتھیار ڈالنے پر مجبور کر دیا جائے گا، ایران کے ساتھ وہ کیا جائے گا جو 47 برس میں کسی امریکی صدر نے نہیں کیا۔

یہ بھی پڑھیں: امریکہ کی ایران پر دوبارہ سے حملے کی تیاری؟

ڈونلڈ ٹرمپ نے کہا کہ ایران کی کلنگ مشین کے خاتمے کا وقت قریب ہے، امریکا کا کوئی نقصان نہیں ہو رہا،ایران ہماری مدد کر رہا ہے لیکن وہ جانتا نہیں، آبنائے ہرمز کی بندش سے ایران کو یومیہ 50 کروڑ ڈالر کا نقصان ہو رہا ہے۔

ان کا مزید کہنا تھا کہ ایران نے جنگ بندی کی سنگین خلاف ورزی کی ہے، ایران نے آبنائے ہرمز میں فرانسیسی اور برطانوی جہازوں کو گولیوں سے نشانہ بنایا۔