رپورٹس کے مطابق حملہ تہران کے مرکزی علاقے میں کیا گیا جہاں ایک رہائشی عمارت کو نشانہ بنایا گیا، تاہم قریبی یہودی عبادت گاہ بھی زد میں آ کر متاثر ہوئی۔ تنگ گلیوں کے باعث آس پاس کی عمارتوں کے اندرونی اور بیرونی حصوں کو بھی شدید نقصان پہنچا ہے۔
تاحال اس حملے میں جانی نقصان کی کوئی مصدقہ اطلاعات سامنے نہیں آئی ہیں، تاہم ریسکیو ٹیمیں ملبے تلے دبے ممکنہ افراد کی تلاش میں مصروف ہیں۔ ایرانی میڈیا کی جانب سے جاری ویڈیوز میں امدادی کارکنوں کو ملبہ ہٹاتے اور زخمیوں کو نکالتے ہوئے دیکھا جا سکتا ہے۔
یہ بھی پڑھیں: ایران کو ایک رات میں تباہ کر دینگے، شاید وہ رات کل ہو: ڈونلڈ ٹرمپ
دوسری جانب اسرائیل نے ایران کے خلاف نئی اور وسیع فضائی کارروائی کا اعلان کیا ہے، جس میں ملک بھر کے مختلف انفراسٹرکچر کو نشانہ بنانے کا دعویٰ کیا گیا ہے۔ اسرائیلی فوج کے مطابق حالیہ حملوں میں دارالحکومت تہران سمیت اہم تنصیبات کو ہدف بنایا گیا۔
اسرائیلی حکام کا کہنا ہے کہ ایران کی جانب سے ممکنہ جوابی کارروائی کے پیش نظر دفاعی نظام کو الرٹ کر دیا گیا ہے جبکہ شہریوں کو موبائل فونز کے ذریعے ہدایات جاری کی گئی ہیں کہ وہ فوری طور پر محفوظ پناہ گاہوں میں منتقل ہو جائیں۔
واضح رہے کہ ایران میں صدیوں سے یہودی برادری موجود ہے اور اندازاً 20 ہزار کے قریب یہودی اب بھی ایران میں مقیم ہیں جبکہ پارلیمنٹ میں ان کے لیے ایک نشست بھی مخصوص ہے۔
