سرکاری خبر ایجنسی کے مطابق شمالی کوریا کے رہنما کم جونگ ان نے میزائل تجربے کی نگرانی کی اور اس موقع پر بحری دفاع کو جدید بنانے کی ضرورت پر زور دیا۔ انہوں نے کہا کہ بحری ڈسٹرائرز کو سپر سونک ہتھیاروں سے لیس کرنا وقت کی اہم ضرورت ہے تاکہ سمندری دفاعی نظام کو مزید مؤثر بنایا جا سکے۔
کم جونگ ان کا کہنا تھا کہ خطے میں بڑھتی ہوئی کشیدگی کے پیش نظر شمالی کوریا اپنی فوجی صلاحیت کو مسلسل بہتر بنا رہا ہے۔ انہوں نے اس عزم کا اظہار کیا کہ ملک کی سلامتی اور خودمختاری کے تحفظ کے لیے جدید ہتھیاروں کی تیاری جاری رکھی جائے گی۔
یہ بھی پڑھیں: امریکی وزیر دفاع کا نئے ایرانی سپریم لیڈر کو اہم پیغام
دوسری جانب شمالی کوریا نے ایران میں نئے سپریم لیڈر کے انتخاب کے حوالے سے بیان دیتے ہوئے کہا ہے کہ ایرانی عوام کو اپنے رہنما کے انتخاب کا مکمل حق حاصل ہے اور اس فیصلے کا احترام کیا جانا چاہیے، ہر ملک کو اپنی سیاسی قیادت کے انتخاب میں خود مختاری حاصل ہونی چاہیے اور بیرونی مداخلت سے گریز کرنا چاہیے۔
شمالی کوریا کی وزارتِ خارجہ کے ترجمان نے کہا ہے کہ ایران کی اسمبلی آف ایکسپرٹس کی جانب سے نئے رہنما کے انتخاب کا احترام کیا جاتا ہے اور یہ ایرانی عوام کا حق ہے کہ وہ اپنی قیادت کا فیصلہ خود کریں۔
ترجمان نے امریکا اور اسرائیل کی جانب سے ایران پر کیے گئے فوجی حملے کو غیر قانونی جارحیت‘ قرار دیتے ہوئے کہا ہے کہ اس اقدام سے خطے کے امن و استحکام کو شدید خطرات لاحق ہوئے اور عالمی سطح پر عدم استحکام میں اضافہ ہوا، کسی ملک کی سیاسی خودمختاری اور علاقائی سالمیت کو نقصان پہنچانا ناقابلِ قبول ہے اور پوری دنیا کو اس کی مذمت کرنی چاہیے۔
