ایرانی وزیرِ خارجہ عباس عراقچی نے کہا کہ ایران دونوں برادر اسلامی ممالک کے درمیان بات چیت کرانے اور اختلافات کے حل میں کردار ادا کرنے کیلئے مکمل طور پر تیار ہے۔
سماجی رابطے کی ویب سائٹ ایکس پر جاری بیان میں انہوں نے کہا کہ ماہِ مبارک ضبطِ نفس، بردباری اور عالمِ اسلام میں اتحاد کو فروغ دینے کا مہینہ ہے۔
ان کا کہنا تھا کہ موجودہ حالات میں یہ نہایت مناسب ہوگا کہ پاکستان اور افغانستان اپنے اختلافات کو مذاکرات کے ذریعے حل کریں اور خطے میں امن و استحکام کو یقینی بنائیں۔
ایرانی وزیرِ خارجہ نے واضح کیا کہ ایران دونوں ممالک کے درمیان مذاکرات کے انعقاد اور سہولت کاری کیلئے ہر ممکن تعاون فراہم کرے گا، باہمی رابطوں اور سفارتی کوششوں سے غلط فہمیاں دور ہوں گی اور برادرانہ تعلقات مزید مضبوط ہوں گے۔
یہ بھی پڑھیں:پاکستان کا طالبان رجیم کیخلاف آپریشن غضب للحق، 72 ہلاک
تجزیہ کاروں کا کہنا ہے کہ حالیہ سرحدی کشیدگی کے تناظر میں ایران کی یہ پیشکش خطے میں امن کے قیام کی ایک اہم کوشش قرار دی جا رہی ہے، اگر فریقین سنجیدہ مذاکرات پر آمادہ ہو جائیں تو مسائل کا پائیدار حل ممکن ہے۔
واضح رہے کہ پاکستان اور افغانستان کے درمیان حالیہ دنوں میں تعلقات میں تناؤ دیکھا گیا ہے، جس کے باعث خطے کی صورتحال پر عالمی برادری کی بھی گہری نظر ہے۔
