خبر ایجنسی کے مطابق حادثہ اس وقت پیش آیا جب تارکینِ وطن کی کشتی یونان کی کوسٹ گارڈ کے ایک جہاز سے ٹکرا گئی۔ تصادم کے بعد کشتی توازن برقرار نہ رکھ سکی اور الٹ گئی، جس سے متعدد افراد سمندر میں جا گرے۔ حادثے کی اطلاع ملتے ہی ریسکیو ٹیموں نے فوری کارروائی کرتے ہوئے امدادی سرگرمیاں شروع کر دیں۔

ریسکیو حکام کا کہنا ہے کہ اب تک 24 افراد کو زندہ بچا لیا گیا ہے، جنہیں ابتدائی طبی امداد کے بعد محفوظ مقامات پر منتقل کر دیا گیا ہے۔ تاہم کشتی میں سوار دیگر افراد کی تلاش کیلئے سرچ آپریشن تاحال جاری ہے۔ حکام کے مطابق حادثے کے وقت کشتی میں 35 سے زائد افراد موجود تھے، جس کے باعث مزید ہلاکتوں کا خدشہ ظاہر کیا جا رہا ہے۔

عینی شاہدین کے مطابق سمندر کی صورتحال نسبتاً خراب تھی، جس نے ریسکیو آپریشن کو مزید مشکل بنا دیا۔ کوسٹ گارڈ، نیوی اور امدادی ادارے مشترکہ طور پر لاپتہ افراد کی تلاش میں مصروف ہیں، جبکہ ہیلی کاپٹروں اور کشتیوں کی مدد سے وسیع علاقے کی نگرانی کی جا رہی ہے۔

یہ بھی پڑھیں:سانحہ گل پلازہ، آگ لگنے کی وجہ سامنے آگئی

واضح رہے کہ یہ واقعہ ایک بار پھر اس تلخ حقیقت کو اجاگر کرتا ہے کہ بہتر مستقبل کی تلاش میں نکلنے والے تارکینِ وطن کس قدر جان لیوا خطرات مول لینے پر مجبور ہیں۔

انسانی حقوق کی تنظیموں نے اس حادثے پر گہرے دکھ کا اظہار کرتے ہوئے یورپی ممالک سے مہاجرین کیلئے محفوظ اور قانونی راستے فراہم کرنے کا مطالبہ کیا ہے۔