الجزیرہ کی رپورٹ کے مطابق تھائی فوج کا کہنا ہے کہ کمبوڈیا کی افواج نے پہلے بھاری ہتھیاروں سے فائرنگ کی، جب کہ کمبوڈیا کی وزارت دفاع نے کہا کہ ان کی افواج نے دفاع میں کارروائی کی، کیوں کہ وہ پہلے حملے کی زد میں آئیں۔

یہ بھی پڑھیں: روسی مسافر طیارہ گر کر تباہ، تمام 49 افراد ہلاک

اطلاعات کے مطابق سرحد کے کئی مقامات پر لڑائی جاری ہے، جو دونوں ممالک کے درمیان ایک طویل عرصے سے جاری سرحدی تنازع کا حصہ ہے، اور یہ تنازع ایک بار پھر مئی میں شدت اختیار کر گیا تھا۔ تھائی لینڈ نے کمبوڈیا سے اپنے سفیر کو واپس بلا لیا، کمبوڈیا نے تھائی لینڈ سے اپنے سفارتی عملے کو واپس بلا کر تمام تھائی سفارت کاروں کو ملک چھوڑنے کا حکم دے دیا۔

تھائی لینڈ کی وزارت دفاع کے ترجمان سوراسنت کونگسیری نے بتایا ہے کہ سرحد کے کم از کم 6 علاقوں میں جھڑپیں جاری ہیں۔ لڑائی اُس وقت پھیلی جب یہ سب سے پہلے قدیم کھمر مندر تا موآن تھوم کے قریب شروع ہوئی، جو تھائی لینڈ کے صوبہ سورن اور کمبوڈیا کے صوبہ اودار مینچی کے درمیان متنازع علاقے میں واقع ہے۔

تھائی لینڈ کے وزیر صحت کا کہنا ہے کہ عام شہریوں کی ہلاکتوں کی تعداد 11 ہوگئی ہے۔ سمساک تھیپسوٹھن کا کہنا ہے کہ کمبوڈیا کے ساتھ سرحدی کشیدگی کے حالیہ واقعات میں 11 تھائی عام شہری اور ایک فوجی ہلاک ہو چکے ہیں۔