واشنگٹن: (سنو نیوز) امریکہ کے سابق صدر اور موجودہ صدارتی امیدوار ڈونلڈ ٹرمپ نے ایک مرتبہ پھر سخت گیر امیگریشن پالیسی کی جانب قدم بڑھاتے ہوئے 12 ممالک کے شہریوں کے امریکہ میں داخلے پر مکمل پابندی عائد کرنے کے بل پر دستخط کر دیئے۔
تفصیلات کے مطابق امریکہ میں داخلے پر مکمل پابندی جن 12 ممالک پر لگائی گئی ہے ان میں گنی، اریٹریا، ہیٹی، ایران، لیبیا، سوڈان، یمن، صومالیہ، افغانستان، میانمار، چاڈ اور کانگو شامل ہیں۔ ان ممالک کے شہریوں کو اب امریکہ کے لیے ویزہ یا امیگریشن کا حصول ممکن نہیں ہوگا۔

یہ بھی پڑھیں: بھارتی ملٹری کا پاکستان کے ہاتھوں طیاروں کی تباہی کا اعتراف

اس کے ساتھ ہی 7 دیگر ممالک پر جزوی پابندیاں بھی عائد کی گئی ہیں جن میں برونڈی، کیوبا، لاؤس، سیرالیون، ترکمانستان، وینزویلا اور ٹوگو شامل ہیں۔ ان ممالک کے شہریوں کو مخصوص ویزہ کیٹگریز میں داخلے کی اجازت نہیں دی جائے گی یا سخت شرائط کے تحت داخلے کی اجازت ہوگی۔
یاد رہے کہ ڈونلڈ ٹرمپ نے اپنے پہلے دورِ صدارت میں بھی متنازع سفری پابندیاں عائد کی تھیں، جن میں خاص طور پر سات اسلامی ممالک کو نشانہ بنایا گیا تھا۔ ان پابندیوں پر اُس وقت دنیا بھر میں شدید تنقید کی گئی تھی اور مظاہرے بھی دیکھنے کو ملے تھے۔
ٹرمپ انتظامیہ کا مؤقف ہے کہ یہ پابندیاں قومی سلامتی، امیگریشن قوانین کی حفاظت، اور دہشتگردی کے خطرات سے بچاؤ کے لیے ضروری ہیں۔ تاہم ناقدین کا کہنا ہے کہ یہ اقدام نسلی تعصب اور مذہبی بنیادوں پر تفریق کو فروغ دیتا ہے۔
تجزیہ کاروں کے مطابق یہ فیصلہ ٹرمپ کی 2024 کی انتخابی مہم کا حصہ ہے جس میں وہ اپنی "امریکہ فرسٹ" پالیسی کو دوبارہ اجاگر کر رہے ہیں تاکہ اپنے حامی ووٹرز کو ایک بار پھر متحرک کیا جا سکے۔ اس فیصلے کے بعد متاثرہ ممالک کے لاکھوں شہریوں کے لیے امریکہ کا سفر خواب بن کر رہ گیا ہے، جبکہ انسانی حقوق کی تنظیموں نے اس پابندی کو غیر انسانی اور متعصبانہ قرار دیا ہے۔