امریکی میڈیا کی رپورٹس کے مطابق وائٹ ہاؤس کی جانب سے جاری بیان میں کہا گیا ہے کہ ڈاکٹرز کی رپورٹ کے مطابق صدر ٹرمپ ذہنی اور جسمانی طور پر بہترین صحت مند ہیں اور بطور سربراہ مملکت اپنی ذمہ داریاں نبھانے کے لیے مکمل اہل ہیں۔

صدر ٹرمپ کا طبی معائنہ کرنیوالے ڈاکٹرز کی رپورٹ میں چند معمولی مسائل کی نشاندہی بھی کی گئی ہے جن میں دھوپ کی وجہ سے جلد کو ہونیوالا نقصان اور گزشتہ برس جولائی میں انتخابی مہم کے دوران قاتلانہ حملے کے دوران دائیں کان پر گولی لگنے کے بعد کا نشان شامل ہے۔

خیال رہے کہ امریکی صدر ڈونلڈ ٹرمپ کا جمعے کے روز سالانہ ذہنی اور جسمانی طبی معائنہ کیا گیا تھا، وائٹ ہاؤس کا کہنا ہے کہ صدر ٹرمپ کی صحت سے متعلق تفصیلی رپورٹ بھی جاری کی جائیگی۔

یاد رہے کہ طبی معانے کے بعد صدر ٹرمپ کا کہنا تھا کہ جسمانی ٹیسٹ کیساتھ ساتھ ذہنی ٹیسٹ بھی اچھا رہا، میرا دل اور دماغ اچھی حالت میں ہیں، مجموعی طور پر میں خود کو صحت مند محسوس کررہا ہوں۔