کمپنی کے مطابق MC 03 کی بیٹری لائف حیران کن حد تک دیگر سمارٹ فونز سے بہتر ہے، یہ فون صارفین کی پرائیویسی کو بھی مدنظر رکھتا ہے اور بیک گراؤنڈ میں ایپس کے ذریعے ڈیٹا اکٹھا کرنے کے عمل کو محدود کرتا ہے۔

فون میں بائی ڈیفالٹ ایپس کو انٹرنیٹ تک رسائی نہیں دی گئی، جس سے بیٹری کا غیر ضروری استعمال ختم ہو جاتا ہے۔ اس خصوصیت کی وجہ سے بیٹری زیادہ دنوں تک چلتی ہے اور صارفین کو روزانہ چارج کرنے کی ضرورت نہیں پڑتی۔

MC 03  اوپن سورس اینڈرائیڈ پراجیکٹ پر مبنی AphyOS آپریٹنگ سسٹم پر کام کرتا ہے، جو صارفین کے ڈیٹا اور پرائیویسی کے تحفظ کو یقینی بناتا ہے۔ فون میں 120 ہرٹز OLED ڈسپلے موجود ہے اور بیٹری کو آسانی سے نکال کر بدلنے کی سہولت بھی فراہم کی گئی ہے۔ فون کے پچھلے حصے میں 3 کیمرے موجود ہیں، جو جدید اور معیاری فوٹوگرافی کے تجربے کی ضمانت دیتے ہیں۔

کمپنی نے بتایا کہ MC 03 کی بیٹری عام استعمال میں 6 سے 7 دن تک چلتی ہے، جبکہ زیادہ استعمال کی صورت میں 4 سے 5 دن تک بھی چارج کی ضرورت نہیں پڑتی۔ دلچسپ بات یہ ہے کہ فون میں بیٹری دیگر فونز جیسی ہی ہے، مگر اس کی بہتر پاور مینجمنٹ اور پرائیویسی فیچرز کی وجہ سے بیٹری لائف میں غیر معمولی اضافہ ہوا ہے۔

MC 03 کو جلد یورپ میں 700 ڈالرز کی قیمت پر فروخت کیلئے پیش کیا جائے گا، یہ فون ایسے صارفین کیلئے بہترین ثابت ہو سکتا ہے جو لمبے سفر یا دفتر میں بغیر چارج کے فون استعمال کرنا چاہتے ہیں۔