میڈیا رپورٹس گوگل انتظامیہ کی جانب سے ایک ہفتے میں دوسری بار ہنگامی سکیورٹی اپ ڈیٹ جاری کی گئی ہے جس میں گوگل صارفین کو ریموٹ کوڈایکزیکیوشن حملوں کے ممکنہ خطرے سے متنبہ کیا گیا ہے۔
اگر آپ بھی ان 3.5 ارب صارفین میں شامل ہیں جو ونڈوز، میک، لینکس یا اینڈرائیڈ پر گوگل کروم استعمال کرتے ہیں، تو محتاط ہو جائیں۔
نئی اپ ڈیٹ CVE-2025-12036 نامی خطرناک بگ کو نشانہ بناتی ہے جو کروم کے V8 جاوا اسکرپٹ انجن میں پایا گیا ہے، اس خامی کے ذریعے ہیکرز کسی متاثرہ ویب سائٹ پر وزٹ کرنے سے سسٹم پر نقصان دہ کوڈ چلانے کے قابل ہو جاتے ہیں۔
گوگل ٹیم کے رکن سرینواس سِستا نے کہا ہے کہ یہ مسئلہ گوگل کے آرٹی فیشل انٹیلی جنس سکیورٹی ٹول "بگ سلیپ" کیجانب سے دریافت کیا گیا ہے، بگ کی مزید تفصیلات کو فی الحال ظاہر نہیں کیا گیا تاکہ زیادہ سے زیادہ صارفین اپ ڈیٹ کو انسٹال کر سکیں۔
یہ اپ ڈیٹ تمام پلیٹ فارمز پر فراہم کی جا چکی ہے اور آئندہ چند روز میں صارفین کے لیے دستیاب ہو گی۔
خود کو محفوظ رکھنے کا طریقہ
اپنے براؤزر کو محفوظ رکھنا آسان ہے، ونڈوز اور میک صارفین کروم کو ورژن 141.0.7390.122 یا .123 تک اپ ڈیٹ کریں، لینکس اور اینڈرائیڈ صارفین کیلئے ورژن 141.0.7390.122 دستیاب ہے۔
عمومی طور پر کروم خودکار طور پر اپ ڈیٹ ہو جاتا ہے لیکن صارفین اسے خود بھی چیک کر سکتے ہیں۔ اس کے لیے سیٹنگ میں جا کر اباؤٹ گوگل کروم پر جائیں، جہاں براؤزر تازہ ترین ورژن خود انسٹال کر دے گا۔
اپ ڈیٹ کے بعد کروم کو دوبارہ کھولنا ضروری ہے ورنہ نیا سکیورٹی پیچ ایکٹو نہیں ہوگا، چونکہ اس خامی کا فائدہ اٹھانے والے حملوں کا پہلے ہی سے آغاز ہو چکا ہے، اس لیے صارفین کے لیے تجویز ہے کہ جلد از جلد اپنا براؤزر اپ ڈیٹ کر لیں تاکہ آپ کا ڈیٹا اور ڈیوائس محفوظ رہیں۔
