سہ ملکی سیریز، پاکستان نے انگلینڈ کو 87 رنز سے ہرا دیا
راولپنڈی میں کھیلے گئے میچ میں انگلینڈ نے ٹاس جیت کر پاکستان کو پہلے بیٹنگ کی دعوت دی۔ قومی ٹیم نے مقررہ 50 اوورز میں 9 وکٹوں کے نقصان پر 302 رنز بنائے، تاہم ہدف کے تعاقب میں انگلش ٹیم 39ویں اوور میں 215 رنز بنا کر آؤٹ ہوگئی۔
پاکستان کی اننگز کا آغاز اچھا نہ رہا اور فخر زمان پہلی ہی گیند پر گس اٹکنسن کی گیند پر جو روٹ کو کیچ دے بیٹھے، جبکہ صائم ایوب 8 رنز بنا کر سونی بیکر کا شکار ہوئے۔ بابراعظم بھی 34 رنز بنا کر ول جیکس کی گیند پر بولڈ ہوگئے۔
یہ بھی پڑھیں: قومی ٹیم کے فاسٹ بولر حارث رؤف کے نانا انتقال کرگئے
ابتدائی وکٹیں گرنے کے بعد حسن نواز اور عرفات منہاس نے ذمہ دارانہ بیٹنگ کا مظاہرہ کیا۔ حسن نواز نے 74 گیندوں پر 79 رنز بنائے، جبکہ عرفات منہاس نے 58 گیندوں پر 59 رنز کی اننگز کھیلی۔ ان کے علاوہ فہیم اشرف نے 39، سعد بیگ نے 35 اور سلمان علی آغا نے 16 رنز اسکور کیے۔ انگلینڈ کی جانب سے سونی بیکر نے 3 جبکہ گس اٹکنسن نے 2 وکٹیں حاصل کیں۔
303 رنز کے ہدف کے تعاقب میں انگلینڈ کی جانب سے ٹام بینٹن 57 رنز کے ساتھ نمایاں رہے، بین ڈکٹ نے 45 اور جو روٹ نے 33 رنز بنائے، تاہم عرفات منہاس کی تباہ کن اسپن بولنگ کے سامنے انگلش بیٹنگ لائن نہ سنبھل سکی اور پوری ٹیم 215 رنز پر ڈھیر ہوگئی۔
واضح رہے کہ پاکستان نے سہ ملکی ون ڈے سیریز کے پہلے میچ میں سری لنکا کو 37 رنز سے شکست دے کر فاتحانہ آغاز کیا تھا۔
