برمنگھم ٹیسٹ، پاکستانی بلے باز رضا اللہ کی شاندار بلے باری،انگلینڈ کو جیت کیلئے 130 رنز کا ہدف
پاکستان کی ٹیم 8 وکٹوں کے نقصان پر 318 رنز پر مشکلات کا شکار تھی، تاہم 21 سالہ ڈیبیو کرنے والے رضا اللہ نے انگلش بولرز کے خلاف جارحانہ بیٹنگ کرتے ہوئے میچ کا نقشہ بدل دیا۔
رضا اللہ نے 81 رنز کی شاندار اننگز کھیلی اور 9 چھکے لگائے، یوں وہ انگلینڈ میں کسی ٹیسٹ اننگز کے دوران سب سے زیادہ چھکے لگانے کے بین اسٹوکس کے ریکارڈ کے برابر آگئے۔
اس سے قبل شان مسعود نے 95 رنز کی عمدہ اننگز کھیلی اور اذان اویس اور کپتان بابر اعظم کے ساتھ اہم شراکت داریاں قائم کرکے پاکستان کو مضبوط بنیاد فراہم کی۔
بعد ازاں رضا اللہ نے محمد عباس کے ساتھ آٹھویں وکٹ پر 121 رنز کی غیر متوقع شراکت قائم کی، جس نے پاکستان کو مشکل صورتحال سے نکال کر میچ میں واپس لے آیا۔
یہ بھی پڑھیں: محمد رضوان اور امام الحق ڈومیسٹک کرکٹ کھیلنے نااہل قرار
انگلینڈ کے بولرز مسلسل ایک طویل دن فیلڈنگ کرنے کے باعث تھکن کا شکار نظر آئے، جبکہ پاکستانی نچلے نمبروں کے بلے بازوں کی جارحانہ بیٹنگ نے میزبان ٹیم کو پریشان کردیا۔
انگلش کپتان نے پاکستانی ٹیل اینڈرز کو روکنے کے لیے مختلف بولنگ آپشنز بھی آزمائے، تاہم رضا اللہ اور محمد عباس کی مزاحمت نے انگلینڈ کو دباؤ میں رکھا۔
رضا اللہ بالآخر ڈین لارنس کی گیند پر اسٹمپ آؤٹ ہوگئے، جس کے ساتھ پاکستان کی اننگز اختتام پذیر ہوئی اور انگلینڈ کو فتح کے لیے 130 رنز کا ہدف مل گیا۔
انگلینڈ کو ہدف کے تعاقب میں فیورٹ قرار دیا جارہا ہے، تاہم مشکل پچ پر 130 رنز کا ہدف بھی آسان ثابت نہیں ہوگا۔ اگر پاکستانی بولرز ابتدائی وکٹیں حاصل کرنے میں کامیاب رہے تو انگلینڈ کی جیت کا سفر مشکل ہوسکتا ہے۔
پاکستان کی جانب سے آخری مرحلے میں دکھائی گئی مزاحمت نے مشکل سیریز میں ٹیم کے حوصلے اور لڑنے کی صلاحیت کو نمایاں کیا ہے۔
