سندھ پولیس نے شاہد آفریدی کو سفیر کھیل مقرر کر دیا
تقریب میں آئی جی سندھ جاوید عالم اوڈھو نے بھی شرکت کی، جہاں شاہد آفریدی کو سفیرِ کھیل مقرر کیے جانے کی سند پیش کی گئی۔
'اس موقع پر آئی جی سندھ اور شاہد آفریدی کے درمیان شیلڈز کا بھی تبادلہ ہوا۔ آئی جی سندھ نے شاہد آفریدی کو سندھ پولیس کا سفیرِ کھیل بننے پر خوش آمدید کہتے ہوئے کہا کہ ان کی شمولیت پولیس کے کھیلوں کے فروغ کے لیے ایک اعزاز ہے۔
جاوید عالم اوڈھو کا کہنا تھا کہ سندھ پولیس میں کھیلوں کا فروغ ہمیشہ ترجیحات میں شامل رہا ہے، جبکہ بزنس کمیونٹی کے تعاون سے کھیلوں کے انعقاد کا خواب بھی پورا ہوا ہے۔
انہوں نے کہا کہ کھیلوں کے انعقاد کا بنیادی مقصد نوجوانوں کو مثبت اور صحت مند سرگرمیوں کی جانب راغب کرنا ہے۔ کھیل نہ صرف نوجوانوں میں نظم و ضبط اور ٹیم ورک کو فروغ دیتے ہیں بلکہ انہیں منشیات اور دیگر منفی سرگرمیوں سے دور رکھنے میں بھی اہم کردار ادا کرسکتے ہیں۔
شاہد آفریدی کی بطور سفیرِ کھیل تقرری سے سندھ پولیس کے کھیلوں سے متعلق اقدامات اور نوجوانوں کو مثبت سرگرمیوں کی طرف لانے کی کوششوں کو مزید تقویت ملنے کی توقع ہے۔
