انگلینڈ سے شکست، سرفراز احمد کو کوچنگ سے ہٹانے کا امکان
لارڈز ٹیسٹ میں قومی ٹیم کی 194 رنز سے شکست کے بعد کوچنگ سیٹ اپ میں اہم تبدیلی کا امکان ظاہر کیا جا رہا ہے۔
ذرائع کے مطابق وائٹ بال ٹیم کے ہیڈ کوچ مائیک ہیسن، جو ڈائریکٹر ہائی پرفارمنس عاقب جاوید کے ہمراہ ایک تقریب میں شرکت کیلئے لندن پہنچے ہیں، اب ٹیسٹ ٹیم کے معاملات بھی دیکھ سکتے ہیں۔
اطلاعات کے مطابق پاکستان کرکٹ بورڈ (پی سی بی) نے مائیک ہیسن کو ٹیسٹ ٹیم کے معاملات کی نگرانی کی ذمہ داری دینے پر غور شروع کردیا ہے۔ امکان ہے کہ وہ برمنگھم کے ایجبیسٹن کرکٹ گراؤنڈ میں 9 ستمبر سے شروع ہونے والے تیسرے اور آخری ٹیسٹ کے دوران ٹیم کے ساتھ موجود رہیں گے۔
مائیک ہیسن نہ صرف ٹیم کی سرگرمیوں میں شامل ہوں گے بلکہ ڈریسنگ روم میں بھی ان کی موجودگی متوقع ہے، جس سے ریڈ بال ٹیم کی کوچنگ کے حوالے سے قیاس آرائیوں میں اضافہ ہوگیا ہے۔
ذرائع کا کہنا ہے کہ اگر یہ فیصلہ حتمی شکل اختیار کرتا ہے تو سرفراز احمد کی بطور ریڈ بال ہیڈ کوچ ذمہ داریاں ختم ہونے کا امکان ہے۔ اس طرح مائیک ہیسن ون ڈے اور ٹی ٹوئنٹی کے بعد ٹیسٹ ٹیم کی کوچنگ کی ذمہ داریاں بھی سنبھال سکتے ہیں۔
یہ بھی پڑھیں:سرفراز احمد کی عمران خان کے بیٹوں کے انٹرویو سے متعلق لاعلمی
ابتدائی اطلاعات کے مطابق سرفراز احمد کو انگلینڈ کے دورے کے اختتام پر ٹیسٹ ٹیم کی کوچنگ سے ہٹایا جاسکتا ہے، تاہم حتمی فیصلہ پاکستان کرکٹ بورڈ کی جانب سے کیا جائے گا۔
