بابر اعظم نے لارڈز ٹیسٹ سے قبل بیٹنگ پریکٹس شروع کر دی

بابر اعظم ویسٹ انڈیز کے خلاف سیریز کے دوران انگلی کی انجری کا شکار ہوئے تھے جبکہ بیکنہم میں پریکٹس میچ کے دوران دوبارہ انگلی پر گیند لگنے سے تکلیف بڑھ گئی تھی۔ تاہم، لارڈز ٹیسٹ سے دو روز قبل انہوں نے فاسٹ بولرز، اسپنرز اور تھرو ڈاؤنز کا سامنا کرتے ہوئے مکمل بیٹنگ سیشن کیا۔

عمر گل نے بتایا کہ بابر اعظم نے نیٹ میں اچھی بیٹنگ کی اور وہ مکمل طور پر پُراعتماد دکھائی دیے۔ ٹیم کو امید ہے کہ بابر اعظم دوسرے ٹیسٹ کے لیے دستیاب ہوں گے۔

بابر کی ممکنہ واپسی پاکستان کی بیٹنگ لائن کے لیے ایک بڑا ریلیف ہے، کیونکہ لیڈز میں کھیلے گئے پہلے ٹیسٹ میں قومی ٹیم کی بیٹنگ انتہائی مایوس کن رہی اور انگلینڈ نے پاکستان کو دونوں اننگز میں 86 اوورز سے بھی کم وقت میں آؤٹ کردیا تھا۔

اس سے قبل ویسٹ انڈیز کے خلاف سیریز میں بابر اعظم پاکستان کے سب سے زیادہ رنز بنانے والے بلے باز رہے تھے۔ انہوں نے دو نصف سنچریوں کی مدد سے 193 رنز اسکور کیے تھے۔

بابر اعظم کو ویسٹ انڈیز کے خلاف سیریز سے قبل دوبارہ پاکستان کا کپتان مقرر کیا گیا تھا۔ لارڈز ٹیسٹ میں واپسی کی صورت میں وہ پہلی مرتبہ انگلینڈ کی سرزمین پر بطور کپتان قومی ٹیم کی قیادت کریں گے، جس سے ان کی واپسی کی اہمیت مزید بڑھ گئی ہے