پانی کے جھگڑے نے کرکٹ کوچ کی جان لے لی
پولیس کے مطابق افسوسناک واقعہ 8 اگست کو کولمبو میں کرکٹ ٹریننگ سیشن کے دوران پیش آیا، جہاں پانی کے حصول پر کھلاڑیوں اور کلب کے ایک ملازم کے درمیان تلخ کلامی کے بعد جھگڑا ہوگیا۔
رپورٹس کے مطابق جھگڑے کے دوران اسمتھ فرنینڈو بھی تصادم کی زد میں آگئے اور انہیں شدید چوٹیں آئیں، واقعے کے بعد انہیں فوری طور پر ہسپتال منتقل کیا گیا، جہاں کئی روز تک زیر علاج رہنے کے بعد وہ انتقال کرگئے۔
پولیس نے واقعے میں مبینہ طور پر ملوث 17 سالہ اسکول کرکٹر کو گرفتار کرکے عدالت میں پیش کیا۔ عدالت نے ملزم کو 17 اگست تک چائلڈ پروبیشن کی تحویل میں بھیج دیا ہے، جبکہ واقعے کی مزید تحقیقات جاری ہیں۔
اسمتھ فرنینڈو کولمبو کے موراتووا میں واقع پرنس آف ویلز کالج کے سابق کرکٹ کوچ تھے، انہوں نے اپنے طویل کوچنگ کیریئر کے دوران متعدد باصلاحیت اسکول کرکٹرز کی تربیت کی اور انہیں کھیل کی بنیادی مہارتوں سے آگاہ کیا۔
یہ بھی پڑھیں:فٹبال میچ کے دوران آسمانی بجلی گرنے سے کھلاڑی جانبحق، 12 زخمی
اسمتھ فرنینڈو کے تربیت یافتہ کھلاڑیوں میں سری لنکا کے موجودہ ون ڈے کپتان کوسل مینڈس بھی شامل ہیں، کوسل مینڈس نے بعد ازاں سری لنکا کے اہم بین الاقوامی کھلاڑی کی حیثیت سے اپنی شناخت بنائی اور اب قومی ون ڈے ٹیم کی قیادت کر رہے ہیں۔
واقعے نے سری لنکن کرکٹ حلقوں میں افسوس کی لہر دوڑا دی ہے، جبکہ پولیس کی جانب سے جھگڑے کی مکمل وجوہات اور واقعے کے دیگر پہلوؤں کا جائزہ لیا جا رہا ہے۔
