سری لنکن ویمن ٹیم کی پاکستان کو 8 وکٹوں سے شکست
ہمبنٹوٹا میں کھیلے گئے دوسرے ون ڈے میچ میں پاکستان ویمن ٹیم نے ٹاس کے بعد پہلے بیٹنگ کرتے ہوئے مقررہ 50 اوورز میں 5 وکٹوں کے نقصان پر 273 رنز بنائے۔ پاکستان کی جانب سے سدرا امین نے شاندار بیٹنگ کا مظاہرہ کرتے ہوئے 120 گیندوں پر 11 چوکوں کی مدد سے سنچری اسکور کی۔
پاکستان کی اننگز میں عائشہ ظفر نے 49 جبکہ منیبہ علی نے 45 رنز بنا کر ٹیم کے مجموعی اسکور میں اہم کردار ادا کیا۔ اس کے علاوہ گلفروزہ نے 27 اور صدف شمش نے 12 رنز بنائے۔ قومی ٹیم نے ایک مضبوط ہدف سری لنکا کے سامنے رکھا۔
ہدف کے تعاقب میں سری لنکن ویمن ٹیم کا آغاز اچھا نہ رہا، کپتان چماری اتاپتو صرف ایک رن بنا کر پویلین لوٹ گئیں، تاہم اس کے بعد وشمی گونا رتنے اور ہرشیتا سامارا وکرما نے شاندار شراکت قائم کرتے ہوئے میچ کا نقشہ بدل دیا۔
دونوں بیٹرز نے دوسری وکٹ کیلئے 203 رنز کی شاندار شراکت داری قائم کی۔ وشمی گونا رتنے نے 123 رنز کی اننگز کھیلی جس میں ایک چھکا اور 11 چوکے شامل تھے، جبکہ ہرشیتا سامارا وکرما نے ناقابل شکست 100 رنز بنا کر ٹیم کو فتح سے ہمکنار کیا۔
سری لنکا ویمن ٹیم نے پاکستان کی جانب سے دیا گیا 274 رنز کا ہدف 47ویں اوور میں صرف 2 وکٹوں کے نقصان پر حاصل کر لیا۔
یہ بھی پڑھیں:ورلڈ کپ جیتنے کے باوجود اصل ٹرافی کیوں نہیں ملتی؟ حیران کن وجہ جانیے
واضح رہے کہ تین ون ڈے میچوں پر مشتمل سیریز اب ایک ایک سے برابر ہے، سیریز کا تیسرا اور فیصلہ کن میچ 31 جولائی کو دمبولا میں کھیلا جائے گا، جہاں دونوں ٹیمیں ٹرافی اپنے نام کرنے کیلئے میدان میں اتریں گی۔
