شاہد آفریدی کا افغانستان کے فاسٹ باؤلر شاپور زدران کے انتقال پر اظہار افسوس

افغانستان کے سابق فاسٹ باؤلر شاپور زدران کے انتقال پر اپنے تعزیتی بیان میں پاکستان کرکٹ کے سابق کپتان شاہد آفریدی نے کہا کہ "بے شک ہم اللّٰہ ہی کے ہیں اور اسی کی طرف لوٹ کر جانا ہے۔" انہوں نے مرحوم کیلئے دعائے مغفرت کرتے ہوئے کہا کہ شاپور زدران ہمیشہ اپنے چاہنے والوں کے دلوں میں زندہ رہیں گے۔

شاہد آفریدی نے سوشل میڈیا پر اپنے پیغام میں لکھا کہ " پیارے شاپور! اللّٰہ تعالیٰ آپ پر اپنی رحمت نازل فرمائے، آپکو جنت الفردوس میں اعلی مقام عطا فرمائے۔"

یہ بھی پڑھیں: افغانستان کے سابق فاسٹ بولر 38 برس کی عمر میں انتقال کر گئے

انہوں نے مزید کہا کہ موت ہر انسان کا مقدر ہے لیکن پشتونوں کی عزت، وقار اور روایات ہمیشہ زندہ رہتی ہیں۔ ان کے بقول موت جسم کو جدا کر سکتی ہے مگر انسان کی محبت، کردار اور اقدار ہمیشہ یاد رکھی جاتی ہیں۔

یاد رہے کہ افغانستان کے سابق بائیں ہاتھ کے فاسٹ بولر شاپور زدران طویل علالت کے بعد نئی دہلی کے ایک اسپتال میں 38 برس کی عمر میں انتقال کر گئے، وہ کینسر کے مرض میں مبتلا تھے اور اسپتال میں زیر علاج تھے۔

شاپور زدران نے افغانستان کی جانب سے 44 ایک روزہ اور 36 ٹی ٹوئینٹی انٹرنیشنل میچز کھیلے نیز 2015 کے آئی سی سی کرکٹ ورلڈکپ میں اسکاٹ لینڈ کے خلاف افغانستان کی تاریخی پہلی فتح میں انہوں نے فاتحانہ رنز بنا کر اپنی ٹیم کو یادگار کامیابی دلائی تھی جسے افغان کرکٹ کی اہم ترین کامیابیوں میں شمار کیا جاتا ہے۔