وسیم اکرم کے انتقال کی افواہوں پر اہلیہ کا ردعمل آگیا
سوئنگ کے سلطان وسیم اکرم کی اہلیہ شنیرا اکرم نے سوشل میڈیا پر گردش کرنے والی جعلی خبروں اور اے آئی سے تیار کردہ ویڈیوز کی واضح تردید کر دی۔
شنیرا اکرم نے افواہوں کا جواب دینے کے لیے وسیم اکرم کی ایک تازہ ویڈیو شیئر کی جس میں وہ جم میں ورزش کرتے دکھائی دے رہے ہیں۔
مذکورہ ویڈیو میں وسیم اکرم کیبل پل ڈاؤنز، پل اپس اور باربیل فلور پریس سمیت مختلف ایکسرسائز کرتے نظر آئے جبکہ آخر میں انہوں نے کیمرے کی طرف دیکھ کر مسکراہٹ بھی دی۔
واضح رہے کہ سوشل میڈیا پر گزشتہ کچھ وقت سے ایسی جعلی پوسٹس اور ویڈیوز وائرل ہو رہی تھیں جن میں دعویٰ کیا جا رہا تھا کہ وسیم اکرم دل کا دورہ پڑنے کے باعث انتقال کر گئے ہیں جس کے باعث سابق کرکٹر کے مداحوں میں تشویش کی لہر دوڑ گئی تھی۔
شنیرا اکرم نے ویڈیو کے ساتھ اپنے پیغام میں کہا کہ یہ ریکارڈنگ انہوں نے سوشل میڈیا پر پھیلنے والی جھوٹی خبروں اور مصنوعی ذہانت سے بنائی گئی ویڈیوز کے جواب میں شیئر کی ہے۔
یہ بھی پڑھیں: شعیب اختر کے بڑے بھائی شاہد اختر انتقال کر گئے
انہوں نے واضح کیا کہ جیسا کہ ویڈیو میں دیکھا جا سکتا ہے، وسیم اکرم جم میں موجود ہیں اور مکمل طور پر خیریت سے ہیں۔
شنیرا اکرم کی جانب سے وضاحت سامنے آنے کے بعد مداحوں نے اطمینان کا اظہار کیا اور وسیم اکرم کی صحت سے متعلق پھیلائی گئی افواہیں دم توڑ گئیں۔
