میڈیا رپورٹس کے مطابق کوئٹہ پی ایس ایل کی فرنچائز گلیڈی ایٹرز کے مالک ندیم عمر نے گلیڈی ایٹرز کے سابق کپتان سرفراز احمد کو ٹیم ڈائریکٹر بنانے کا اعلان کیا ہے۔

فرنچائز اونر ندیم عمر نے کہا کہ امید ہے سرفراز بحیثیت ٹیم ڈائریکٹر بھی بہترین خدمات انجام دیں گے، اس سے پہلے سرفراز احمد بحیثیت کپتان کوئٹہ گلیڈی ایٹرز کی نمائندگی کر چکے ہیں، بطور کپتان سرفراز نے پی ایس ایل 2019 میں کوئٹہ گلیڈی ایٹرز کو ٹائٹل جتوایا تھا۔

خیال رہے کہ رواں برس کے آغاز میں سرفراز احمد کا پی ایس ایل فرنچائز کوئٹہ گلیڈی ایٹرز کیساتھ 9 سالہ طویل سفر اختتام پذیر ہوگیا تھا، فوٹو اینڈ ویڈیو شیئرنگ ایپ انسٹا گرام کے ذریعے اپنی ایک پوسٹ میں سرفراز احمد نے کوئٹہ گلیڈی ایٹرز کیساتھ اپنے سفر کے اختتام کا اعلان کیا تھا۔

اس موقع پر فرنچائز کے مالک ندیم عمر کا شکریہ ادا کرتے ہوئے سرفراز احمد نے کہا تھا کہ میں آج آپ کو یہ بتانا چاہتا ہوں کہ کوئٹہ گلیڈی ایٹرز کے ساتھ میرا وقت ختم ہوگیا۔

یاد رہے کہ سرفراز احمد نے 8 ایڈیشنز میں کوئٹہ گلیڈی ایٹرز کی قیادت کی تھی تاہم 9ویں سیزن کے لیے سرفراز احمد کی جگہ رائلی روسو کو کپتان مقرر کیا گیا تھا۔

خیال رہے کہ 2019 میں سرفراز احمد کی قیادت میں کوئٹہ گلیڈی ایٹرز نے پہلی مرتبہ ٹائٹل جیتا تھا ۔