میٹرک اور انٹر کے طلبہ کیلئے بڑی خوشخبری
تفصیلات کے مطابق پیکٹا نے پہلے مرحلے میں نویں اور گیارہویں جماعت کا سمارٹ سلیبس جاری کیا، جبکہ دوسرے مرحلے میں دسویں اور بارہویں جماعت کیلئے بھی نیا نصاب جاری کردیا گیا ہے۔
اس کے علاوہ کمپیوٹر سائنس اور مسیحی طلبہ کیلئے بھی سمارٹ سلیبس جاری کیا گیا، جبکہ میٹرک ٹیک کا سمارٹ سلیبس بھی سامنے آگیا ہے۔ تاہم میٹرک اور انٹر کیلئے ترجمۃ القرآن اور اخلاقیات کے سمارٹ سلیبس کا اجرا تاحال نہیں ہوسکا۔
پیکٹا کے مطابق آئندہ سال ہونے والے میٹرک اور انٹرمیڈیٹ کے بورڈ امتحانات نئے سمارٹ سلیبس کے تحت لیے جائیں گے۔ اس اقدام کا مقصد طلبہ پر تعلیمی بوجھ کم کرنا اور انہیں امتحانات کی بہتر تیاری کا موقع فراہم کرنا ہے۔
ترجمان پیکٹا کا کہنا ہے کہ طلبہ کی تعلیمی ضروریات کو مدنظر رکھتے ہوئے سمارٹ سلیبس تیار کیا گیا ہے تاکہ وہ اہم نصابی موضوعات پر زیادہ توجہ دے سکیں اور امتحانات کی تیاری منظم انداز میں کرسکیں۔
دوسری جانب طلبہ اور والدین سمارٹ سلیبس کی مکمل تفصیلات کے منتظر ہیں۔ پیکٹا ہفتے کے روز نصاب میں کی گئی تبدیلیوں کی تفصیلات سامنے لائے گا، جس کے بعد طلبہ کو معلوم ہوسکے گا کہ آئندہ بورڈ امتحانات میں کن اسباق اور موضوعات سے سوالات شامل ہوں گے۔