مولانا فضل الرحمان سے منسلک مدارس کو سی ڈی اے کے نوٹس جاری
تفصیلات کے مطابق سی ڈی اے نے اسلام آباد میں واقع مولانا فضل الرحمان سے منسلک مدارس کی عمارتوں کا جائزہ لینے کے بعد غیر قانونی تعمیرات اور منظور شدہ نقشوں کے بغیر عمارتیں تعمیر کرنے پر کارروائی شروع کردی ہے۔
اس سلسلے میں مدرسہ اختر العلوم کی انتظامیہ کو بھی نوٹس جاری کیا گیا ہے، جس میں عمارت کی تعمیر کیلئے منظور شدہ نقشہ جمع نہ کرانے پر وضاحت طلب کی گئی ہے۔
سی ڈی اے نے مدرسہ اختر العلوم کی انتظامیہ کو ہدایت کی ہے کہ وہ 15 روز کے اندر عمارت کا منظور شدہ نقشہ متعلقہ حکام کے پاس جمع کرائے اور تعمیراتی ضوابط کی پابندی یقینی بنائے۔
اتھارٹی کی جانب سے واضح کیا گیا ہے کہ مقررہ مدت میں قانونی تقاضے پورے نہ کرنے اور تعمیراتی قوانین کی خلاف ورزی برقرار رہنے کی صورت میں متعلقہ عمارتوں کو سیل کرنے سمیت دیگر قانونی کارروائی عمل میں لائی جاسکتی ہے۔
سی ڈی اے حکام کے مطابق اسلام آباد میں تعمیراتی قوانین پر عمل درآمد یقینی بنانے کیلئے اقدامات کیے جا رہے ہیں اور کسی بھی عمارت میں غیر قانونی تعمیرات کی اجازت نہیں دی جائے گی۔
یہ بھی پڑھیں:جماعت اسلامی کا ایک بار پھر سڑکوں پر آنے کا اعلان
اتھارٹی نے متعلقہ مدارس کی انتظامیہ کو مقررہ مدت کے اندر اصلاحی اقدامات مکمل کرنے کی ہدایت کرتے ہوئے خبردار کیا ہے کہ عدم تعمیل کی صورت میں قانون کے مطابق کارروائی کی جائے گی۔
