سکیورٹی فورسز کا ڈی آئی خان میں آپریشن، 6 خوارج ہلاک، 2 جوان شہید
پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے 24 اکتوبر کو ڈی آئی خان کے علاقے زرکانی میں انٹیلی جنس بیسڈ آپریشن کیا، جس کے دوران شدید فائرنگ کا تبادلہ ہوا۔ کارروائی میں بھارتی سرپرستی میں سرگرم 6 خوارج ہلاک ہوگئے۔
آئی ایس پی آر کے مطابق شہید ہونے والے جوانوں میں نائب نائیک غلام مرتضیٰ اور سپاہی تاثیر احمد شامل ہیں۔ 36 سالہ نائب نائیک غلام مرتضیٰ کا تعلق ضلع گجرات، جبکہ 30 سالہ سپاہی تاثیر احمد کا تعلق ضلع تلہ گنگ سے تھا۔
ترجمان پاک فوج کے مطابق آپریشن کے دوران ہلاک خوارج کے قبضے سے اسلحہ اور گولہ بارود بھی برآمد کیا گیا۔ ہلاک افراد سکیورٹی فورسز، قانون نافذ کرنے والے اداروں پر حملوں اور معصوم شہریوں کے قتل سمیت متعدد دہشت گردانہ کارروائیوں میں ملوث تھے۔
آئی ایس پی آر کا کہنا ہے کہ علاقے میں مزید بھارتی سرپرستی میں سرگرم خوارج کی موجودگی کے خاتمے کے لیے کلیئرنس آپریشن جاری ہے۔
بیان میں مزید کہا گیا کہ عزمِ استحکام کے تحت سکیورٹی فورسز اور قانون نافذ کرنے والے اداروں کی انسدادِ دہشت گردی مہم پوری رفتار سے جاری رہے گی، جبکہ ملک سے غیر ملکی سرپرستی اور حمایت یافتہ دہشت گردی کے خاتمے کے لیے کارروائیاں بھی جاری رکھی جائیں گی۔
