معروف ڈھولک نواز عامر دیوان کی کار نہر میں جا گری، تلاش جاری
ریسکیو حکام کے مطابق حادثہ اس وقت پیش آیا جب کار کا ٹائی راڈ ٹوٹ گیا، جس کے باعث گاڑی بے قابو ہوکر روہڑی کینال میں جا گری، حادثے کے وقت کار میں مجموعی طور پر 6 افراد سوار تھے۔
حادثے کی اطلاع ملتے ہی ریسکیو ٹیمیں موقع پر پہنچ گئیں اور امدادی کارروائیاں شروع کردیں۔ ریسکیو اہلکاروں نے کار میں سوار 5 افراد کو بحفاظت باہر نکال لیا، تاہم معروف ڈھولک نواز عامر دیوان کا تاحال کوئی سراغ نہیں مل سکا۔
ریسکیو حکام کا کہنا ہے کہ عامر دیوان کی تلاش کے لیے روہڑی کینال میں سرچ آپریشن جاری ہے۔ حادثے میں بچ جانے والے 5 افراد معمولی زخمی ہوئے، جنہیں طبی امداد کے لیے سول اسپتال منتقل کردیا گیا۔
ابتدائی اطلاعات کے مطابق عامر دیوان ایک پروگرام میں شرکت کے بعد واپس جا رہے تھے اور انہیں گھر چھوڑنے کے لیے کار میں لے جایا جا رہا تھا کہ راستے میں یہ افسوسناک حادثہ پیش آگیا۔
ریسکیو ٹیمیں لاپتہ ڈھولک نواز کی تلاش میں مصروف ہیں، تاہم ان کے حوالے سے تاحال کوئی حتمی اطلاع سامنے نہیں آئی۔
