بس اور کار میں خوفناک تصادم، بچے سمیت 5 افراد جاں بحق
حادثے کے بعد علاقے میں کہرام مچ گیا جبکہ بس ڈرائیور موقع سے فرار ہوگیا۔
ریسکیو ذرائع کے مطابق حادثہ اس وقت پیش آیا جب کراچی سے سانگھڑ جانے والی مسافر بس کی سانگھڑ سے سعید آباد جانے والی کار سے ٹکر ہوگئی۔ تصادم اتنا شدید تھا کہ کار میں سوار 4 افراد موقع پر ہی دم توڑ گئے، جبکہ دیگر افراد زخمی ہوگئے۔
واقعے کی اطلاع ملتے ہی ریسکیو اہلکار جائے حادثہ پر پہنچ گئے اور زخمیوں کو فوری طور پر طبی امداد فراہم کرنے کے بعد اسپتال منتقل کیا گیا۔ دورانِ منتقلی حیدرآباد لے جاتے ہوئے ایک زخمی خاتون بھی دم توڑ گئی، جس کے بعد حادثے میں جاں بحق افراد کی تعداد 5 ہوگئی۔
ریسکیو ذرائع کے مطابق جاں بحق ہونے والوں میں 2 مرد، 2 خواتین اور ایک بچہ شامل ہے، تمام جاں بحق افراد کا تعلق ضلع مٹیاری سے بتایا گیا ہے۔
حادثے میں زخمی ہونے والے 3 افراد کی حالت تشویش ناک بتائی جا رہی ہے، جنہیں طبی امداد فراہم کی جا رہی ہے۔
دوسری جانب حادثے کے بعد مسافر بس کا ڈرائیور موقع سے فرار ہوگیا، متعلقہ حکام کے مطابق فرار ہونے والے ڈرائیور کی تلاش جاری ہے۔
حادثے کے باعث علاقے میں افسوس ناک صورت حال پیدا ہوگئی، جبکہ واقعے کی مزید تفصیلات اور حادثے کی وجوہات سامنے آنے کا انتظار ہے۔
