مستحق طلبہ کو اسکالرشپس دینے کا اعلان
تفصیلات کے مطابق پاکستان بیت المال خیبر پختونخوا کے ڈائریکٹر ڈاکٹر لعل بادشاہ نے فاٹا یونیورسٹی کا دورہ کیا، جہاں انہوں نے وائس چانسلر پروفیسر ڈاکٹر محسن نواز سے ملاقات کی۔ اس موقع پر دونوں اداروں کے درمیان مستحق طلبہ کو اسکالرشپس فراہم کرنے پر اتفاق کیا گیا۔
تعلیمی تعاون کو باضابطہ شکل دینے کے لیے دونوں اداروں کے درمیان جلد مفاہمتی یادداشت پر دستخط کیے جائیں گے، جس کے بعد اسکالرشپس کی فراہمی کے حوالے سے عملی اقدامات کیے جائیں گے۔
ملاقات کے دوران طلبہ کی تعلیمی ضروریات، مالی معاونت اور اعلیٰ تعلیم کے فروغ سے متعلق مختلف امور پر تفصیلی تبادلہ خیال بھی کیا گیا۔ اس موقع پر دونوں اداروں کے انتظامی افسران کے علاوہ زرعی یونیورسٹی پشاور کے ڈائریکٹر اسپورٹس محمد بلال مروت بھی موجود تھے۔
فاٹا یونیورسٹی کے وائس چانسلر پروفیسر ڈاکٹر محسن نواز نے اس موقع پر کہا کہ مالی مشکلات کسی بھی مستحق طالب علم کی تعلیم کے حصول میں رکاوٹ نہیں بننی چاہئیں۔
انہوں نے کہا کہ یونیورسٹی انتظامیہ طلبہ کو معیاری تعلیم فراہم کرنے، تعلیمی سہولیات بہتر بنانے اور ان کے مسائل حل کرنے کے لیے پرعزم ہے۔
وائس چانسلر نے مستحق طلبہ کی معاونت کے لیے پاکستان بیت المال کے اقدام کو سراہتے ہوئے امید ظاہر کی کہ اسکالرشپس سے طلبہ کو تعلیمی اخراجات پورے کرنے میں مدد ملے گی۔
انہوں نے کہا کہ اس طرح کے اقدامات سے مستحق طلبہ کو مالی پریشانیوں کے بغیر اعلیٰ تعلیم جاری رکھنے کے بہتر مواقع میسر آئیں گے۔
