سانحہ پشاور: جاں بحق بچوں کے لواحقین کو 10 لاکھ، زخمیوں کو 2 لاکھ روپے امداد کا اعلان
میڈیا سے گفتگو کرتے ہوئے فیصل کریم کنڈی نے بتایا کہ حادثے میں جاں بحق ہونے والے ہر بچے کے لواحقین کو 10 لاکھ روپے جبکہ زخمیوں کو فی کس 2 لاکھ روپے امداد دی جائے گی۔
گورنر خیبرپختونخوا کے مطابق اسکول کی چھت گرنے کے واقعے کی وجوہات جاننے اور ذمہ داروں کا تعین کرنے کے لیے تحقیقاتی کمیٹیاں قائم کردی گئی ہیں۔ انکوائری رپورٹ 4 دن کے اندر پیش کرنے کی ہدایت کی گئی ہے۔
یہ بھی پڑھیں: ای پاسپورٹ کی نئی فیسوں کا شیڈول جاری، تمام تفصیلات سامنے آگئیں
فیصل کریم کنڈی نے کہا کہ تحقیقات کے دوران واقعے کے ذمہ داروں کے ساتھ ساتھ اسکول کو این او سی جاری کرنے والے متعلقہ حکام کا بھی تعین کیا جائے گا۔ انہوں نے واضح کیا کہ بچوں کی زندگیوں اور سلامتی پر کسی قسم کا سمجھوتہ نہیں کیا جائے گا۔
گورنر خیبرپختونخوا نے صوبے بھر کے سرکاری اسکولوں کی عمارتوں کا اسٹرکچرل آڈٹ کرانے کا عندیہ بھی دیا، تاکہ تعلیمی اداروں کی عمارتوں کی مضبوطی اور طلبہ کے تحفظ کا جائزہ لیا جاسکے۔
واقعے کے بعد امدادی اقدامات اور تحقیقات کے ساتھ تعلیمی اداروں کی عمارتوں کی حفاظت کا معاملہ بھی اہمیت اختیار کرگیا ہے، جبکہ انکوائری رپورٹ میں حادثے کی وجوہات اور ذمہ داروں سے متعلق تفصیلات سامنے آنے کی توقع ہے۔
