لاہور میں گندگی پھیلانے والوں کیخلاف سخت کارروائی کا فیصلہ
شہر میں گندگی پھیلانے والوں کے خلاف کاروائیوں کا آغاز رواں ہفتے سے ہوگا، جس کے لیے ویسٹ مینجمنٹ کمپنی (ایل ڈبلیو ایم سی) اور سیف سٹی اتھارٹی مشترکہ طور پر نگرانی کریں گے۔
ابتدائی مرحلے میں لاہور کی 10 بڑی مارکیٹوں کو کاروائی کے لیے منتخب کیا گیا ہے جہاں سیف سٹی کیمروں کی مدد سے سڑکوں اور عوامی مقامات پر کوڑا پھینکنے والوں کی نشاندھی کی جائے گی۔
سی ای او ایل ڈبلیو ایم سی شہریار خان کے مطابق کیمروں سے خلاف ورزی سامنے آنے پر کمپنی کا فیلڈ اسٹاف فوری طور پر پہنچے گا اور ذمہ دار شخص کے خلاف کاروائی کرے گا۔
انہوں نے بتایا کہ دکاندار کو گندگی پھیلانے کی ویڈیو بھی دکھائی جائے گی جبکہ خلاف ورزی پر 5 ہزار سے 50 ہزار روپے تک جرمانہ کیا جاسکے گا۔
سی ای او کے مطابق ماحول آلودہ کرنے یا کوڑے کو اگ لگانے جیسے سنگین اقدامات پر 5 لاکھ روپے تک جرمانہ عائد کیا جائے گا۔
یہ بھی پڑھیں: انکم ٹیکس گوشوارے جمع کرانے کی تاریخ میں توسیع
ابتدائی مرحلے میں جن اہم علاقوں اور مارکیٹوں کو شامل کیا گیا ہے ان میں مال روڈ جیل روڈ، فیروز پور روڈ، گلبرگ مین بلیوارڈ اور لبرٹی چوک سمیت دیگر تجارتی مراکز شامل ہیں۔
شہریار خان نے واضح کیا کہ 10 مارکیٹوں میں کارروائی کے بعد مہم کا دائرہ مزید بڑھایا جائے گا۔ دیگر مارکیٹوں، تجارتی مراکز اور گاڑیوں سے سڑکوں پر کوڑا پھینکنے والوں کے خلاف بھی کارروائی کی جائے گی۔
